Соёл, спорт, аялал жуулчлал, залуучуудын яамны Төрийн захиргааны удирдлагын газрын дарга Б.Алтантуяа Бүгд Найрамдах Польш Улсын Легниц Поле хотын захирагч Рафал Плезиаг хүлээн авч уулзлаа.
Уулзалтын эхэнд Төрийн захиргааны удирдлагын газрын дарга Б.Алтантуяа Монгол Улсын Ерөнхийлөгч У.Хүрэлсүхийн Бүгд Найрамдах Польш Улсад 2025 онд хийсэн төрийн айлчлалын үеэр хоёр улсын харилцаа иж бүрэн түншлэлийн харилцааны түвшинд хүрч, Монголын Үндэсний олон нийтийн радио, телевиз, Монгол кино нэгтгэл зэрэг байгууллага, Бүгд Найрамдах Польш Улсын ижил түвшний байгууллагуудтай хамтын ажиллагааны баримт бичигт гарын үсэг зурсан талаар дурдаж, санамж бичгийн хүрээнд хамтран ажиллахад бэлэн болохоо илэрхийлэв.
Бүгд Найрамдах Польш Улсын Легниц Поле хотын захирагч Рафал Плезиа алдарт Легницийн тулалдааны тухай жил бүр Легниц Поле хотын ойролцоо зохион байгуулдаг театрчилсан тоглолт болон соёл, урлагийн үйл ажиллагааг зохион байгуулах чиглэлээр Монгол Улсаас Бүгд Найрамдах Польш Улсад суугаа Элчин сайдын яам болон Европ тивд амьдарч буй монголчууд, Монголын морин харвааны байгууллага, урлагийн хамтлагуудтай хамтран ажиллаж, Монгол Улсын соёл, түүхийг түгээж ирсэн тухай танилцуулж, цаашид төр, хувийн хэвшлийн байгууллагуудтай хамтран ажиллахыг зорьж буйгаа танилцуулав.
Уулзалтын төгсгөлд талууд Монгол, Польш хоёр улсын хамтын ажиллагааг хөгжүүлэх, түүхэн үйл явдлыг сурталчлах, хоёр улсын түүх соёлыг харилцан таниулах, жуулчдын урсгалыг нэмэгдүүлэх чиглэлээр хамтран ажиллах талаар санал солилцсон талаар ССАЖЗЯ-наас мэдээлэв.
