УИХ-ын Байгаль орчин, хүнс, хөдөө аж ахуйн байнгын хорооны дарга М.Мандхай Камбожийн Хаант Улсын Хааны академийн ерөнхийлөгч Сок Төүч тэргүүтэй төлөөлөгчдийг хүлээн авч уулзав.
Уулзалтын эхэнд Байнгын хорооны дарга М.Мандхай Монгол Улсын Үндсэн хуулийн 2023 оны өөрчлөлтөөр олон нам, эвслийн төлөөллийг хангасан, 126 гишүүнтэй, анхны парламентын тухай танилцуулаад, Цөлжилттэй тэмцэх конвенцын талуудын 17 дугаар бага хурал (COP17)-ыг наймдугаар сард зохион байгуулж буйг дуулгалаа. СОР17 нь НҮБ-аас зарласан “Олон улсын бэлчээр ба нүүдлийн мал аж ахуй эрхлэгчдийн жил”-тэй уялдан зохион байгуулагдах тул бэлчээрийн тогтвортой менежмент, дасан зохицох арга хэлбэр, дэлхийд бэлчээрийн экосистемээс шууд хамааралтай 1 тэрбум гаруй хүний амьжиргааны асуудлыг олон улсын анхааралд хүргэхэд чухал дэмжлэг болно гэдэгт итгэж буйгаа тэрбээр илэрхийлсэн юм.
Монгол Улс газрыг нөхөн сэргээх, тогтвортой ашиглах, уур амьсгалд өөрчлөлтөд дасан зохицсон, тэсвэрлэх байдлыг нэмэх зорилгоор “Тэрбум мод” үндэсний хөдөлгөөн, “Цагаан алт”, “Шинэ хоршоо” олон нийтэд түшиглэсэн хөдөөгийн хөгжлийн санаачилга, “Хүнсний хувьсгал” хөдөө аж ахуй, хөрс хамгааллын санаачилгыг дэвшүүлж, ган, цөлжилтийн эсрэг эдийн засгаа сайжруулах, хөдөөгийн хүн амын хөдөлмөр эрхлэлтийн бүтээмжийг нэмж, уур амьсгалын өөрчлөлтийг сааруулах бодлогоо тодорхойлон ажиллаж байгааг Байнгын хорооны дарга М.Мандхай хэлэв.
Түүнчлэн бэлчээрээс хамааралтай нүүдлийн мал аж ахуй, өв уламжлалыг хадгалах зорилгоор бэлчээр хамгаалах арга механизмыг улсынхаа онцлогт тохируулан хэрэгжүүлэх, бэлчээрийн доройтлыг багасгах хууль, эрх зүйн орчныг сайжруулахад идэвхтэй ажиллаж байгаагаа тэмдэглэжээ.
Камбожийн Хааны Академийн ерөнхийлөгч Сок Төүч яриандаа Камбожийн эдийн засагт хөдөө аж ахуйн салбар чухал байр суурь эзэлдэг тул хүн амын ихэнх хэсэг энэ салбарт ажилладгийг дурдлаа. Энэ хүрээнд Монгол, Камбож улс тогтвортой хөдөө аж ахуй, ургамлын үйлдвэрлэл, хүнсний аюулгүй байдал, уур амьсгалын өөрчлөлтөд дасан зохицох арга технологи, эрдэм шинжилгээ, инновац, хүний нөөцийн чадавхыг бэхжүүлэхэд хамтын ажиллагаагаа өргөжүүлэх боломжтой гэдгээ илэрхийлэв.
Талууд уулзалтаар хоёр улсын хөдөө аж ахуй, ялангуяа бэлчээрийн мал аж ахуйн тогтвортой хөгжил, малын үүлдэр угсааг сайжруулах, мал аж ахуйн үйлдвэрлэлийн бүтээмж, өрсөлдөх чадварыг нэмэхэд хамтын ажиллагааг өргөжүүлэх боломжийн талаар санал солилцлоо.
Байнгын хорооны дарга М.Мандхай Монгол, Камбож улсын хамтын ажиллагаанд шаардлагатай бодлогын орчныг бэхжүүлэх, хоёр улсын сайн туршлагыг солилцох, цаашдын хамтын ажиллагааны боломжит чиглэлийг тодорхойлох зэрэг асуудлыг хөндөн, санал солилцож, хамтран ажиллахад бэлэн гэдгээ илэрхийлснийг УИХ-ын ХМОНХГ мэдээллээ.
