/МОНЦАМЭ/ Бүгд Найрамдах Киргиз Улсын нийслэл Бишкек хотноо “Шинэ эринд Шанхайн үзэл санаа: Нийтлэг үнэт зүйлсээс бодит хамтын ажиллагаанд” сэдэвт Шанхайн хамтын ажиллагааны байгууллагын Мэдээлэл, судалгааны байгууллагуудын дээд түвшний уулзалт болж байна.

Дээд түвшний уулзалтыг Киргизийн Ерөнхийлөгчийн Тамгын газрын Мэдээллийн бодлого хариуцсан захирал Дайырбек Орунбеков, хамтран зохион байгуулагч Синьхуа агентлагийн дэд ерөнхийлөгч Ши Янчун, Кабар агентлагийн дарга М.Шерметалиев нар нээж, ШХАБ–ын хүрээнд харилцан ашигтай хамтын ажиллагааг цаашид бэхжүүлж, олон нийтэд үнэн зөв мэдээ мэдээлэл хүргэх, зөвшилцлийг цогцлооход хамтрагч байгууллагуудын идэвхтэй үйл ажиллагаа, үүрэг оролцоо чухал болохыг онцоллоо.

Уулзалтад ШХАБ-ын гишүүн болон түнш орнууд, бүс нутгийн 200 гаруй хэвлэл мэдээллийн байгууллага, судалгааны институт, ТББ-ын төлөөлөгч оролцож, бүс нутгийн хөгжил, хамтын ажиллагааг эрчимжүүлэх, энх тайван, зөвшилцлийг дээдлэх, хуурамч мэдээлэлтэй тэмцэх, НҮБ төвтэй олон улсын тогтолцоонд хөгжиж буй орнуудын оролцоог нэмэгдүүлэх, тэдний дуу хоолойг шийдвэр гаргах түвшинд хүргэх “Даян дэлхийн засаглалын санаачилга”-ыг хэвлэл мэдээлэл, судалгааны байгууллагууд дэмжиж ажиллах, мэдээллийн агентлагууд хоорондоо мэдээ солилцох нэгдсэн платформ байгуулах зэрэг сэдвийг хөндөн хэлэлцүүлэг өрнүүлэв.

Монгол Улсаас Үндэсний мэдээллийн МОНЦАМЭ агентлаг, МУИС, судалгааны байгууллагын төлөөлөгчид энэхүү уулзалтад оролцож байна. Энэ хүрээнд МОНЦАМЭ агентлагийн дарга Х.Энх-Орших Синьхуа агентлагийн дэд ерөнхийлөгч Ши Янчунтэй хоёр талын уулзалт хийж, агентлаг хоорондын хамтын ажиллагааны талаар санал солилцов.

Бүгд Найрамдах Киргиз Улс ШХАБ-ыг 2025-2026 онд даргалах үүрэг хүлээж байгаа бөгөөд тус улсын нийслэлд наймдугаар сарын 30-наас 9 дүгээр сарын 1-ний өдрүүдэд ШХАБ-ын дээд хэмжээний уулзалт болох юм.