Засгийн газрын өнөөдрийн хуралдаанаар гарсан батлан хамгаалах салбартай холбоотой мэдээллийг Батлан хамгаалах яамны дэд сайд Д.Баасандамба танилцууллаа.  

Тэрбээр ярихдаа “Жил бүрийн үндэсний их баяр наадмаар цэргийн ёслолын жагсаал болдог. Ёслолын жагсаал нь улс орны тусгаар тогтнол, аюулгүй байдлын төлөөх баатарлаг тэмцлийн түүхийг хүүхэд залуус, иргэддээ ойлгуулах ач холбогдолтой. Энэ жил Тулгар төр байгуулагдсаны 2235 жил, Их Монгол Улс байгуулагдсаны 820 жилийн ой, Ардын хувьсгалын 105 жилийн ой тохиож байгаа тул Монгол Улсын Ерөнхийлөгч болон Засгийн газрын шийдвэрээр цэргийн ёслолын жагсаалыг зэвсэгт техниктэй буюу бүрэн дэлгэмэл хийнэ” гэв.  

Засгийн газрын өнөөдрийн хуралдаанаар зэвсэгт техниктэй жагсаал хийхэд шаардлагатай бэлтгэл ажлын зардал, жагсаал зохион байгуулах шийдвэр гаргасан байна. Долдугаар сарын 10 буюу Төрийн далбааны өдөр цэргийн болон хууль сахиулахын 8500 гаруй алба хаагч ёслолын жагсаалд оролцох бол 90 гаруй зэвсэг техник буюу байлдааны сөнөөгч онгоц, нисдэг тэрэг, тусгай тоног төхөөрөмжүүдийг оролцуулсан техникийн парад зохион байгуулахаар болжээ. Парадад Монгол Улсын батлан хамгаалах, аюулгүй байдлын салбарт шинээр нэвтрүүлсэн цэргийн болон тусгай зориуллалтын тоног төхөөрөмжийг харуулна.

Мөн Монгол Улсад дотооддоо үйлдвэрлэж буй байлдааны хуягласан хүнд болон хөнгөн машинууд, дронуудыг танилцуулахаар төлөвлөсөн байна.