Шинжлэх Ухааны Академийн Түүх, археологийн хүрээлэн, Монголын Үндэсний музей, Бүгд Найрамдах Солонгос Улсын Үндэсний музей хамтран хэрэгжүүлдэг “МОН-СОЛ” төслийн судалгааны баг 2013-2016 оны хооронд Төв аймгийн Баянжаргалан сумын нутагт орших Гуа дов хэмээх Хүннүгийн үеийн дурсгалт газар хийсэн  археологи, геофизикийн олон талт судалгааны үр дүнг нэгтгэсэн эрдэм шинжилгээний тайлан-хамтын бүтээлийг хэвлүүлсэн юм.

Номын нээлт Төв аймгийн нийтийн номын санд боллоо. Нээлтийн үйл ажилгаанд аймгийн ИТХ-ын дарга Ц.Энхбат, аймгийн Засаг дарга Ж.Батжаргал, ШУА-ийн Түүх, археологийн хүрээлэнгийн захирал Академич С.Чулуун, аймгийн Засаг даргын орлогч Ч.Сарангэрэл, аймгийн ЗДТГ-ын НБХ-ийн дарга Мөнхцэцэг, ШУА-ийн Түүх, археологийн хүрээлэнгийн эрдэм шижилгээний тэргүүлэх ажилтан доктор, профессор Г.Эрэгзэн, ШУТИС-ийн багш доктор, профессор Л.Эрдэнэболд, ШУА-ийн Түүх, археологийн хүрээлэнгийн эрдэм шижилгээний ажилтан П.Алдармөнх нар хүрэлцэн ирсны зэрэгцээ аймгийн сургуулийн Түүх, Нийгмийн багш судлаачид ирж баяр хүргэсэн байна.

Мөн номын нээлтийн үйл ажилгааны үеэр ШУА-ийн Түүх, археологийн хүрээлэнгийн захирал Академич С.Чулуун Төв аймгийн Түүх, археологийн чиглэлийн “Аялал жуулчлалын маршрут”-ыг танилцуулахаас гадна аймгийн нийтийн номын санд 1.500.000 төгрөгийн үнэ бүхий номнууд хандивлалаа.