“Эрдэнэс Монгол”-ын нэрийг “Чингис хаан баялгийн сан нэгдэл” гэж өөрчилж, төрийн өмчит 14 компанийг татан буулгалаа.

“Эрдэнэс Монгол” нэгдлийн бүтэц, зохион байгуулалтыг оновчтой болгох, зардлыг багасгах, үр ашгийг нэмэх зорилгоор нэгдлийн харьяанд байгаа хуулийн этгээдийг хууль тогтоомжид нийцүүлэн өөрчлөн байгуулах, татан буулгах тухай Засгийн газрын тогтоол баталжээ. Тогтоолын дагуу “Чингис хаан үндэсний баялгийн сан”, “Эрдэнэс Метан” ХХК-ийг “Эрдэнэс Монгол” ХХК-д тус тус нэгтгэснийг Засгийн газрын ХМОНХГ мэдээлэв.

Мөн “Хөтөл энержи дулаан” ХХК-ийг “Цемент шохой” ХХК-д, “Шивээ сервис” ХХК-ийг “Шивээ овоо” ХК-д нэгтгэж, “Зэс боловсруулах цогцолбор”, “Дархан стийл”, “Багануур-илч” ХХК-ийг тус тус татан буулгалаа.

“Эрдэнэс Монгол” нэгдлийн харьяанд үйл ажиллагаа явуулж буй хамтарсан хөрөнгө оруулалттай “Эрдэнэт ойл”, “Монголын эрдэс баялгийн бирж”, “Эрдэнэс шивээ энержи”, “Шим техноложи”, “Төв Азийн Уран”, “Гашуун сухайтын төмөр зам”, “Зөөхэрд” ХХК-ийг татан буулгахаар шийджээ.

ТӨК-ийн шинэчлэлийг эхлүүлж, 14 компанийг татан буулгаснаар 260 орон тооны давхардлыг арилгаж, захиргааны зардлыг 10, түрээсийн зардлыг 30 хувиар багасган, 67,3 тэрбум төгрөг хэмнэснийг Ерөнхий сайд Н.Учрал мэдэгдээд, “Эрдэнэс Монгол” нэгдэл Үндэсний баялгийн сангийн тухай хуульд заасан чиг үүргээ хэрэгжүүлэх нөхцөл бүрдэж байгааг онцлов.

Дээрх тогтоолоор “Эрдэнэс Монгол”-ын нэрийг “Чингис хаан баялгийн сан нэгдэл” ХХК гэж, “Эрдэнэс критикал минералс” ТӨҮГ-ын нэрийг “Монголросцветмет” гэж өөрчиллөө. “Эрдэнэс Монгол” нэгдлийн шинэчлэл, бүтцийн өөрчлөлт хийх тухай Засгийн газрын тогтоолыг баталснаар нэгдлийн бүтэц, зохион байгуулалт, үйл ажиллагааны уялдаа сайжирч, чиг үүргийн давхардал арилах, хөрөнгө болон хүний нөөцийн ашиглалт оновчтой болох, төрийн өмчит компанийн засаглал, хяналт, хариуцлага, ил тод байдал бэхжих, Үндэсний баялгийн санд төвлөрөх орлогыг нэмэх нөхцөл бүрдэнэ гэж үзсэн байна.