Улаанбаатар хотын гол нэрийн зарим барааны үнэ 2026 оны зургаадугаар сарын 02-ны байдлаар өмнөх сараас 2.0 хувь, өмнөх долоо хоногоос 1.4 хувиар өсжээ.

Үнийн өсөлт голчлон махны үнэд төвлөрөв. Тухайлбал, үхрийн ястай махны дундаж үнэ өмнөх сараас 7.9 хувиар нэмэгдэж, нэг кг нь 33741 төгрөгт хүрсэн бол ямааны ястай мах 7.2 хувь, үхрийн цул мах 4.4 хувь, хонины ястай мах 4.2 хувь, адууны ястай мах 2.5 хувиар тус тус өссөн дүн гарчээ.

Өмнөх долоо хоногтой харьцуулахад мөн махны үнэ илүү нэмэгдсэн үзүүлэлттэй байна. Үхрийн ястай мах 4.4 хувь, хонины ястай мах 3.8 хувь, адууны ястай мах 2.3 хувь, үхрийн цул мах 2.0 хувь, ямааны ястай мах 1.6 хувиар өсөв.

Бусад хүнсний бүтээгдэхүүнээс элсэн чихрийн үнэ өмнөх сараас 2.3 хувь, өмнөх долоо хоногоос 1.2 хувиар нэмэгдэж, нэг кг нь 5124 төгрөг болжээ. Мөн хар талхны үнэ өмнөх сар болон долоо хоногийн дүнгээр 2.6 хувийн өсөлттэй гарсан байна.

Харин зарим нэр төрлийн барааны үнэ буурчээ. Алимны үнэ өмнөх сараас 3.6 хувь, сонгино 3.3 хувь, ногоон цай 1.6 хувиар хямдрав. Өмнөх долоо хоногтой харьцуулахад сонгины үнэ 3.6 хувь, алим 3.4 хувь, хүрэн манжин 1.7 хувиар тус тус буурсан дүнтэй гарлаа.

Шатахууны үнэд томоохон өөрчлөлт ажиглагдсангүй. Аи-92 автобензин нэг литр нь 2590 төгрөг, дизелийн түлш 4334 төгрөгийн дундаж үнэтэй хэвээр байна.

Ийнхүү Улаанбаатар хотод гол нэрийн барааны үнэ долоо хоног болон сарын дүнгээр өсөхөд махны үнийн нэмэгдэл голлон нөлөөлжээ.