Дэлхийн Банкны санхүүжилтээр “Монгол Улсын тээврийн холболт, логистикийг хөгжүүлэх төсөл”-ийн хүрээнд улсын чанартай авто замын ачаалал их хэсгийг шинэчлэх, нийт 368 км хатуу хучилттай авто зам, 7 байршилд 876 урт метр гүүрийг засаж шинэчлэхээр төлөвлөжээ.

Үндсэн барилга угсралтын ажлыг энэ онд эхлүүлээр ажиллаж байгаа талаар Зам, тээврийн сайд Б.Дэлгэрсайхан Дэлхийн Банкны Зүүн Ази, Номхон далайн бүсийн дэд бүтэц хариуцсан захирал Судешна Гош Банержитай уулзах үеэрээ ярилцаж, зам, тээврийн салбарт хэрэгжүүлж буй, цаашид хамтран хэрэгжүүлэх төсөл, хөтөлбөрийн талаар санал солилцлоо.

Сайд Б.Дэлгэрсайхан Дэлхийн Банкнаас манай улсын эдийн засаг, нийгмийн хөгжилд ач холбогдолтой зам, тээврийн салбарт хөрөнгө оруулж, хамтын ажиллагааг өргөжүүлж байгаад талархаад, Улаанбаатар-Лүн чиглэлийн авто замыг зургаан эгнээ болгон өргөтгөх төслийн талаар ярилцаж, тус бүтээн байгуулалтын хүрээнд хэрэгжих гүүрэн байгууламжуудын барилгыг ойрын хугацаанд эхлүүлэхээр бэлтгэж байгааг танилцуулав. Мөн Улаанбаатар-Мандалговь чиглэлийн 270 км авто замыг 4 эгнээ болгон өргөтгөх төслийн тухай ч ярилцсаныг ЗТЯ мэдээлжээ.

Уулзалтын үеэр иргэний нисэхийн салбарын тухайд энэ онд олон улсын шууд нислэг хүлээн авах зорилго тавьж Ховд, Өмнөговь, Хөвсгөл, Баян-Өлгий аймгийн нисэх буудлыг өргөтгөхөөр Чех улсын “Транскон электроник системс” компанийн мэргэжилтнүүдтэй уулзаж, хамтран ажиллах талаар тодорхой санал солилцоод байгаагаа ч дуулгасан юм.

Дэлхийн Банкнаас авто замын салбарт хэрэгжүүлэх төсөл хөтөлбөрийн хүрээнд холбогдох санхүүжилт олгох боломжтойг мэдээлж, энэ хүрээнд хийх бэлтгэл ажил, холбогдох албан бичгүүдийг богино хугацаанд цэгцлэхийн хэрээр ажил эрчимтэй үргэлжлэхийг тэмдэглэв.

Уулзалтын төгсгөлд талууд Монгол Улсын зам, тээврийн салбар дахь хамтын ажиллагааг цаашид улам өргөжүүлэн хөгжүүлэхэд хамтран ажиллахаар санал нэгджээ.