Монгол Улс, Евразийн эдийн засгийн холбоо (ЕАЭЗХ), түүний гишүүн орнууд хооронд байгуулсан Худалдааны түр хэлэлцээрийг энэ оны 7 дугаар сарын 22-ны өдрөөс хүчин төгөлдөр мөрдөж эхэлнэ.

Үүнийг баталгаажуулж, “Монгол Улс, Евразийн эдийн засгийн холбоо, түүний гишүүн орнууд хооронд байгуулсан Худалдааны түр хэлэлцээр хүчин төгөлдөр болох тухай хамтарсан мэдэгдэл”-д Эдийн засаг, хөгжлийн сайд Ж.Энхбаяр, Евразийн эдийн засгийн комиссын Сайд нарын зөвлөлийн гишүүн, Худалдаа хариуцсан сайд А.А.Слепнев гарын үсэг зурлаа.

ЭЗХЯ, Евразийн эдийн засгийн комисс хамтран цахим уулзалт зохион байгуулах үеэр Евразийн эдийн засгийн комиссоос ЕАЭЗХ-ны бүх гишүүн улс тус хэлэлцээрийг дотоодын хууль тогтоомжийн дагуу соёрхон баталалсан албан ёсны нот бичгийг Монгол Улсаас ОХУ-д суугаа Онц бөгөөд Бүрэн Эрхт Элчин сайд Д.Даваад гардуулан өгчээ.

Талууд “Монгол Улс, Евразийн эдийн засгийн холбоо, түүний гишүүн орнууд хооронд байгуулсан Худалдааны түр хэлэлцээрийг хэрэгжүүлэх хамтарсан замын зураглал”-ыг баталгаажуулж, энэ дагуу үр дүнтэй хэрэгжүүлэх, холбогдох байгууллагын хамтын ажиллагааг эрчимжүүлэхэд нягт хамтран ажиллахаа илэрхийлснийг ЭЗХЯ мэдээлэв.

Дээрх хэлэлцээр нь Монголын экспортын бараа бүтээгдэхүүнийг 180 сая гаруй хүн амтай ЕАЭЗХ-ны зах зээлд илүү таатай нөхцөлөөр экспортлох боломж бүрдүүлэхийн зэрэгцээ худалдааны саад тотгорыг багасгах, бизнесийн орчныг сайжруулах, худалдаа, хөрөнгө оруулалт, үйлдвэрлэлийн хамтын ажиллагааг өргөжүүлэх ач холбогдолтой. Түүнчлэн Монгол Улсын бүс нутгийн эдийн засгийн интеграцид оролцох оролцоог нэмж, экспортын бүтэц, зах зээлийг төрөлжүүлэхэд дэмжлэг үзүүлэх юм.

Цахим уулзалтад ЭЗХЯ, Евразийн эдийн засгийн комиссын удирдлагууд, Монгол Улсаас ОХУ-д суугаа Онц бөгөөд Бүрэн эрхт Элчин сайд, Монгол Улсад суугаа ОХУ, Бүгд Найрамдах Беларус Улс, Бүгд Найрамдах Казахстан Улс, Бүгд Найрамдах Киргиз Улсын Онц бөгөөд Бүрэн эрхт Элчин сайд нар оролцжээ.