Монгол Улсын Засгийн газрын гишүүн, Зам, тээврийн сайд Б.Дэлгэрсайхан (2026.05.19) Япон Улсын "Oriental Consultants Global" групп компанийн төмөр замын судалгааны багийн төлөөлөгчдийг хүлээн авч уулзлаа. Уулзалтад тус компанийн төмөр замын төлөвлөлтийн инженер, багийн ахлагч Шимизү Такаши, багийн дэд ахлагч бөгөөд рельс болон өртөөний төлөвлөлтийн инженер Урамото Шохэй, төслийн бэлтгэл ажил хариуцсан инженер Б.Доржханд нар оролцлоо.

Талууд "Чингис хаан" олон улсын нисэх буудлын төмөр замын шугамын хөгжлийн төлөвлөлтийн бэлтгэл судалгааны ажлын хүрээнд мэдээлэл солилцож, төслийн явц болон цаашдын хамтын ажиллагааны талаар санал солилцлоо.

Мөн энэ үеэр Улаанбаатар хот орчимд MRT буюу MRT (Mass Rapid Transit) төсөл хэрэгжүүлэх боломж, талбайн судалгаа, бодит нөхцөл байдалд нийцсэн шийдлүүд, нийслэл хотод нэвтрүүлэх боломжтой япон технологийн талаар ярилцлаа.

Зам, тээврийн сайд Б.Дэлгэрсайхан 2026 оны хоёрдугаар сард Япон Улсад албан айлчлал хийх үеэрээ Улаанбаатар хот-"Чингис хаан" олон улсын нисэх онгоцны буудлыг холбосон төмөр замын төслийн танилцуулга судалгааг хийж өгөх хүсэлтийг уламжилсан бөгөөд энэ дагуу төслийн бэлтгэл судалгааг Японы Олон улсын тээврийн хамтын ажиллагааны нийгэмлэг буюу "Japan Transport Cooperation Association (JTCA)"-ийн дэмжлэгтэйгээр "Oriental Consultants Global" компани гүйцэтгэж байна.

Тус компани нь төслийн бэлтгэл судалгааны ажлын хүрээнд техник, эдийн засгийн үндэслэл (ТЭЗҮ), зураг төслийн стандарт боловсруулах дэмжлэг, суурь зураг төсөл, барилгын ажлын хяналт, TOD болон орчмын хөгжлийн дэмжлэг, ашиглалт, засвар арчлалтын чиглэлээр зөвлөмж боловсруулах, төслийн хөгжүүлэлтийн урьдчилсан судалгааг хийхээр төлөвлөөд ажиллаж буй юм.

Уг төслийг дэмжижгч "JTCA" байгууллагыг JICA олон улсын байгууллагатай андуурах тохиолдол байдаг учир "Japan Transport Cooperation Association (JTCA)" нь 1973 онд хөгжиж буй орнуудын нийгэм, эдийн засгийн хөгжилд хувь нэмэр оруулах зорилгын хүрээнд байгуулагдсан бөгөөд, тээврийн дэд бүтцийн хөгжлийн салбар дахь Япон Улсын цорын ганц олон улсын хамтын ажиллагааны байгууллага юм гэдгийг Япон улсын төлөөлөгчид онцлон танилцууллаа.

Мөн энэхүү төсөл нь LRT хөнгөн галт тэрэгний төсөл бус MRT (Mass Rapid Transit) буюу Хурдан Тээврийн Систем гэсэн нэршилдээ илүү тохироно, энэ нь дэлхийн томоохон хотуудын замын түгжрэлийг бууруулах, зорчигчдыг богино хугацаанд тээвэрлэх зориулалттай метро болон хөнгөн галт тэрэгний нэгдсэн сүлжээ юм...гэдгийг мөн тайлбарлалаа.

Уулзалтын үеэр талууд төмөр замын төслийн маршрут сонголт, өртөөний байршил, холболтын зангилааны төлөвлөлт, газарзүйн онцлог болон зам дагуух саад тотгорын судалгааны талаар санал солилцож, мэргэжлийн зөвлөмжүүдийг хэлэлцлээ.

Зам, тээврийн сайд Б.Дэлгэрсайхан нисэх буудлын төмөр зам нь тойрог шугам байх, эсвэл зөвхөн баруун чиглэлд үйлчлэх хувилбаруудыг судлах, мөн нийслэл хот руу орж ирэх шугамын төлөвлөлтийг шинэ нисэх буудал, цаашлаад Хүннү хотын хөгжилтэй уялдуулах шаардлагатайг онцоллоо. Түүнчлэн баруун талаараа Буянт Ухаа нисэх буудалтай холбох, Үндэсний цэцэрлэгт хүрээлэн хшрэх чиглэлийг хотын хөгжилтэй хэрхэн уялдуулах тухай санал солилцлоо.

Уулзалтын төгсгөлд, талууд дээрх санал зөвлөмжүүдийг нэгтгэн төслийн бэлтгэл судалгааны ажлыг илүү боловсронгуй болгон дахин уулзахаар тогтов. гэж Зам, Тээврийн яамнаас мэдээллээ.