Улаанбаатар-“Чингис хаан” Олон улсын нисэх буудлыг холбох төмөр замын төслийн маршрут сонголт, өртөө, холболтын зангилааны төлөвлөлт, газарзүйн онцлог, зам дагуух саад тотгорыг судлах талаар санал солилцож, мэргэжлийн зөвлөмжийг хэлэлцлээ.

Энэ талаар Зам, тээврийн сайд Б.Дэлгэрсайхан Японы “Oriental Consultants Global” группын төмөр замын судалгааны багийнхныг хүлээн авч уулзах үеэрээ ярилцан, санал зөвлөмжүүдийг нэгтгэж, төслийн судалгааг илүү боловсронгуй болгож, дахин уулзахаар тогтсоныг ЗТЯ мэдээлэв.

Талууд “Чингис хаан” ОУНБ-ын төмөр замын шугамын хөгжлийн төлөвлөлтийн судалгаа”-ны хүрээнд мэдээлэл солилцож, төслийн явц, хамтын ажиллагаа, мөн Улаанбаатар орчимд MRT хөнгөн галт тэрэгний төсөл хэрэгжүүлэх, талбайн судалгаа, бодит нөхцөл байдалд нийцсэн шийдэл, нийслэлд нэвтрүүлэх боломжтой япон технологийн талаар ярилцлаа.

Сайд Б.Дэлгэрсайхан энэ оны хоёрдугаар сард Япон Улсад албан айлчлал хийхдээ төмөр замын дээрх төслийн танилцуулга судалгааг хийж өгөх хүссэнээр судалгааг Японы Олон улсын тээврийн хамтын ажиллагааны нийгэмлэгийн дэмжлэгээр “Oriental Consultants Global” компани гүйцэтгэж байгаа юм. Тус компани нь төслийн ТЭЗҮ, зураг төслийн стандарт боловсруулах дэмжлэг, суурь зураг төсөл, барилгын ажлын хяналт, орчмын хөгжлийн дэмжлэг, ашиглалт, засвар арчлалтын зөвлөмж боловсруулах, төслийн хөгжүүлэлтийн урьдчилсан судалгааг хийхээр төлөвлөжээ.

Зам, тээврийн сайд Б.Дэлгэрсайхан энэ төмөр зам нь тойрог шугам байх, эсвэл зөвхөн баруун чиглэлд үйлчлэх хувилбарыг судлах, мөн нийслэл рүү орж ирэх шугамын төлөвлөлтийг шинэ нисэх буудал, Хүннү хотын хөгжилтэй уялдуулах шаардлагатайг онцлоод, баруун талаараа Буянт Ухаа нисэх буудалтай холбох, Үндэсний цэцэрлэгт хүрээлэн хүрэх чиглэлийг хотын хөгжилтэй хэрхэн уялдуулах тухай санал солилцсон байна.

Уулзалтад тус компанийн төмөр замын төлөвлөлтийн инженер, багийн ахлагч Шимизү Такаши, багийн дэд ахлагч бөгөөд өртөөний төлөвлөлтийн инженер Урамото Шохэй, төслийн бэлтгэл ажил хариуцсан инженер Б.Доржханд нар оролцжээ.