“Монголын төмөр зам” ТӨХК нь стратегийн ач холбогдол бүхий бүтээн байгуулалтын төслийг санхүүжүүлэхээр 300 тэрбум төгрөгийн үнийн дүн бүхий “MTZ бонд”-ыг дотоодын хөрөнгийн зах зээлээс амжилттай татан төвлөрүүлжээ.

Энэ бонд нь Монгол Улсын түүхэнд төрийн өмчит компани анх удаа өөрийн хөрөнгөөр баталгаажуулан гаргасан санхүүгийн хэрэгсэл болж буйгаараа онцлогийг “Монголын төмөр зам” ТӨХК мэдээлэв.

Бондыг нэг жилийн 17 хувийн хүүтэйгээр хөрөнгө оруулагчдад санал болгож, арилжааг "Тэнгэр Капитал" үнэт цаасны компанитай хамтран зохион байгууллаа. Энэ нь дотоодын хөрөнгийн зах зээлийн багтаамжийг нэмэх, томоохон дэд бүтцийн төслүүдийг зах зээлийн зарчмаар санхүүжүүлэх шинэ гарцыг нээж өгсөн ач холбогдолтой юм.

Бондын арилжаа амжилттай болсонтой холбогдуулан "Тэнгэр Капитал" ҮЦК-ийн удирдлагууд Зам, тээврийн сайд Б.Дэлгэрсайхан, “Монголын төмөр зам” ТӨХК-ийн Гүйцэтгэх захирал О.Батчулуунтай уулзаж, хамтын ажиллагаанд талархал илэрхийлсэн байна.

Тус санхүүжилтийг Багахангай-Хөшигийн хөндий-Эмээлт чиглэлийн төмөр замын бүтээн байгуулалтад зарцуулах бөгөөд цаашид олон улсын банк, санхүүгийн байгууллагуудаас бага хүүтэй, урт хугацааны хөрөнгө оруулалт татах замаар уг бондыг хугацаанаас нь өмнө буцаан худалдан авахаар төлөвлөжээ.