Монгол улс, БНХАУ тээврийн салбарын хамтын ажиллагааг өргөжүүлж, хил дамнасан тээвэр, логистикийн үр ашгийг нэмэх, томоохон дэд бүтцийн төслүүдийг эрчимжүүлэхэд хамтран ажиллана.

Энэ тухайд санал нэгдэж буйгаа ХБНГУ-ын Лайвциг хотноо зохион байгуулж буй Олон улсын тээврийн форумын үеэр Зам, тээврийн сайд Б.Дэлгэрсайхан БНХАУ-ын Тээврийн дэд сайд Ли Ян нар уулзах үеэрээ илэрхийлснийг ЗТЯ мэдээлэв.

Уулзалтаар талууд хоёр улсын авто тээвэр, иргэний нисэх, төмөр зам, логистикийн салбарын хамтын ажиллагааг эрчимжүүлэх, хил дамнасан тээврийн нөхцөлийг сайжруулах, худалдаа, уул уурхайн бүтээгдэхүүний экспорт нэмэгдэж байгаатай холбоотой улс хоорондын ачаа тээврийн “С” төрлийн зөвшөөрлийн бичгийн тоог нэмэх тухай санал солилцлоо.

Авто тээврийн салбарын хүрээнд Засгийн газар хооронд 2023 онд шинэчлэн байгуулсан “Олон улсын авто тээврийн харилцааны тухай” хэлэлцээрийн хэрэгжилтийг эрчимжүүлэхийг сайд танилцууллаа. Тодруулбал, хоёр улсын хооронд болон дамжин өнгөрөх олон улсын авто тээврийг хэрэгжүүлэх эрх зүйн орчин бүрдсэн ч монгол жолооч нар БНХАУ-ын нутаг дэвсгэрт жолоочийн даатгалд хамрагдах, зөвшөөрлийн бичгийн хэрэглээ, хилийн бүртгэлийн зохицуулалт тодорхойгүй байгаа нь тээвэр хийхэд хүндрэл учруулж байгааг уламжилж, асуудлыг шийдэхэд дэмжлэг хүсэв. Мөн монголын тээвэрлэгчид БНХАУ руу аюултай ачаа тээвэрлэх боломж хязгаарлагдмал байгаа талаар ярилцсан байна.

Иргэний нисэхийн салбарын хүрээнд Монгол Улс, БНХАУ хоорондын “Агаарын харилцааны тухай” хэлэлцээрийг шинэчлэх, нислэгийн давтамжийг нэмэхийг ч хэлэлцжээ.