Санхүүгийн зохицуулах хороо Олон улсын санхүүгийн хүртээмжийн нийгэмлэг (AFI)-тэй хамтран “Жендэрт суурилсан хүртээмжтэй санхүүжилтийг хяналтын тогтолцоонд нэвтрүүлэх нь” олон улсын сургалт зохион байгуулж байна.

СЗХ-ны дарга Т.Жамбаажамц энэ үеэр “Бид санхүүгийн үйлчилгээний хүртээмжийг нэмэхэд жендерийн тэгш байдлыг онцгой анхаардаг. Тухайлбал, “Компанийн засаглалын кодекс”-д компанийн ТУЗ-ийн бүрэлдэхүүнд хүйсийн зохистой тэнцвэрийг хангуулахаас гадна санхүүгийн хүртээмж, иргэдийн санхүүгийн эрүүл мэндийг үнэлэх судалгаа хийж, өгөгдөлд суурилсан бодлого, шийдвэр гаргадаг. Мөн жендерийн тэгш байдлыг дэмжих, эмэгтэйчүүдийн эдийн засгийн оролцоог нэмэх, хөрөнгийн зах зээлээр дамжуулж төсөл хөтөлбөр санхүүжүүлэх зохицуулалт хийснээр дотоодын компаниудаас нийгмийн болон тогтвортой байдлын бонд гаргаад байна. Энэ нь Төв Азийн бүс нутагтаа анхны жендэр бондын нэг болж, манлайллаа. “Эмэгтэй бизнес эрхлэгчдийн санхүүгийн код”-д өнгөрсөн онд бүртгүүлж, одоогоор банк бус санхүүгийн 28 байгууллага, мэргэжлийн 4 холбоо нэгдээд байгаа нь оролцогчдын ойлголт, оролцоо нэмэгдэж буйн илрэл юм. Санхүүгийн хүртээмжтэй тогтолцоо бүрдүүлэхэд чанартай өгөгдөл, оновчтой бодлого, хамтран ажиллагч түншийн хамтын ажиллагаа шаардлагатай энэ үед олон улсын сургалт хийж буй нь туршлага солилцох, суралцах, зохицуулалт, хяналтын арга барилаа боловсронгуй болгох ач холбогдолтой”-г онцоллоо.

Сургалт нь манай улсын санхүүгийн салбарын зохицуулалт, хяналтын чадавхыг олон улсын жишигт нийцүүлэн бэхжүүлэхийн зэрэгцээ эмэгтэйчүүдэд ээлтэй, хүртээмжтэй, шударга санхүүгийн тогтолцоог хөгжүүлэхэд хувь нэмэр  болох юм. Сургалтад 40 гаруй орны санхүүгийн зохицуулагч байгууллага, төв банкны бодлого боловсруулагч, хяналт шалгалтын мэргэжилтнээс бүрдсэн 70 гаруй төлөөлөгч оролцож, жендэрийн мэдрэмжтэй хяналтын тогтолцоо, эрсдэлд суурилсан хяналт, хэрэглэгчийн гомдол барагдуулах механизм, санхүүгийн боловсрол, залилангаас урьдчилан сэргийлэх арга хэрэгсэл, хиймэл оюун, SupTech шийдлийг ашиглах туршлага солилцож байна. СЗХ-ноос монголд хэрэгжүүлж буй санхүүгийн зах зээлийн бодлого, эмэгтэйчүүдийн санхүүгийн хүртээмжийг нэмэх, зах зээлийн зан төлөвийн хяналтын тогтолцооны шинэчлэл, хэрэглэгчийн хамгааллын тухай ч танилцуулна. Мөн хяналтын шатанд хэрэгжүүлэх, эрсдэлийн үнэлгээний матриц, хяналт шалгалтын аргачлал, зах зээлийн мониторингийн хэрэгсэл, хүйсийн мэдрэмжийг системтэй тусгах техникийн мэдлэг, ур чадварыг олгох юм. 

СЗХ-ны Судалгаа хөгжлийн газрын дарга Б.Батчимэг ярихдаа, “Сургалтаар эмэгтэй бизнес эрхлэгчдийн санхүүгийн үйлчилгээний хүртээмжийг нэмэх, хүйсийн тэнцвэрийг хангах тухай, бодлого зохицуулагч байгууллагуудын төлөөлөл туршлага солилцож байна. Манай улс санхүүгийн үйлчилгээний хүртээмжийн үзүүлэлтээрээ 2025 онд дэлхийд есдүгээр байрт жагсаж, хөгжингүй орнуудтай эн зэрэгцэж байгаа. Хувь хэрэглэгч, харилцагчийн хувьд хүйс, нас, боловсролын ялгаа төдийлөн байдаггүй. Эмэгтэй бизнес эрхлэгчийн хүртэж буй санхүүгийн үйлчилгээний тоо адил ч санхүүжилт нь зөрүүтэй байх нь бий. Иймд тэдэнд зориулж хэд хэдэн бонд гарган, 300 гаруй бизнес эрхлэгчийг санхүүжүүлсэн” гэв.

Санхүүгийн хүртээмжийн нийгэмлэг нь хөгжиж буй 100 гаруй улс орны төв банк, санхүүгийн зохицуулагч байгууллагын гишүүнчлэлтэй, хүн амын ядуу буурай хэсэгт санхүүгийн үйлчилгээг ойртуулж ажилладаг олон улсын байгууллага юм. СЗХ тус нийгэмлэгт 2010 онд гишүүнээр элссэн бөгөөд нийгэмлэгийн долоон ажлын хэсэгт ажилладаг. СЗХ байгуулагдсаны 20 жилийн ой энэ онд тохиож байгаатай уялдуулан олон улсын сургалтыг энэ сарын 4-8-нд зохион байгуулж байна.