Шилдэг татвар төлөгчдөд шагнал гардуулах ёслол Төрийн ордонд өнөөдөр боллоо.
Ерөнхий сайд Н.Учрал энэ үеэр хэлэхдээ Засгийн газар татварын дарамтыг бууруулж, шударга татварын тогтолцоог бий болгох, баялаг бүтээгчдээ дэмжиж ажлын байр нэмэгдүүлэх, эдийн засгийг тэлэх бодлого барьж ажиллаж буйгаа илэрхийлж, эх орныхоо хөгжилд үнэтэй хувь нэмэр оруулж буй шилдэг татвар төлөгчдөдөө талархал илэрхийллээ. Шинэ Засгийн газар байгуулагдаад нэг сар болж байна, Засгийн газрын хуралдаан бүрд татвар төлөгч, бизнес эрхлэгч, баялаг бүтээгчдийг дэмжсэн шийдвэр гаргасныг онцоллоо. Мөн Засгийн газраас өргөн барьсан Татварын хуулийн нэмэлт, өөрчлөлтийн төслийн талаар танилцууллаа.
Аж ахуйн нэгжийн орлогын албан татварын тухай хуулийн хүрээнд: Татварын шатлалыг зөөлрүүлж 25 хувийн татвар ногдуулах босгыг 6 тэрбум төгрөгөөс 10 тэрбум төгрөг болгон нэмэгдүүлж, 6-10 тэрбум төгрөгийн орлогод 15 хувийн татвар ногдуулах зохицуулалтыг нэвтрүүлнэ. Мөн 90 хувийн татварын хөнгөлөлт эдлэх борлуулалтын орлогын босгыг 2.5 тэрбум төгрөг болгон өсгөж, илүү олон бизнесийг дэмжинэ.
Нэмэгдсэн өртгийн албан татварын тухай хуулийн хүрээнд: НӨАТ суутган төлөгчийн босгыг 400 сая төгрөг болгож, импортын бараанд ногдуулсан НӨАТ төлөх хугацааг хоёр сар хүртэлх хугацаагаар хойшлуулах боломжийг бүрдүүлнэ.
Хувь хүний орлогын албан татварын тухай хуулийн хүрээнд: Сарын 792 мянган төгрөг хүртэлх орлогод ногдох татварыг 100 хувь буцаан олгож, бодит орлогыг хамгаална. Мөн 1 тэрбум төгрөг хүртэлх үйл ажиллагааны орлогод 1 хувийн татвар ногдуулах хялбаршуулсан горимыг хэрэгжүүлнэ. Түүнчлэн иргэд өмчилсөн орон сууцаа борлуулсан тохиолдолд үл хөдлөх хөрөнгө борлуулсны албан татвараас чөлөөлж, амьдрах орчноо сайжруулах боломжийг татварын бодлогоор дэмжинэ.
Татварын ерөнхий хуулийн хүрээнд: Зөвхөн татварын ачааллыг бууруулаад зогсохгүй, татварын орчныг илүү шударга, уян хатан болгож тайлан засварлах хугацааг 24 сар болгон сунгаж, бизнес, иргэдэд алдаагаа засах боломж олгохоор төсөлд тусгажээ. Тус үеэр төсвийн орлогыг бүрдүүлэхэд үнэтэй хувь нэмэр оруулсан нийт 50 аж ахуйн нэгж, байгууллагад шагнал гардууллаа. Үүнд:
НЭГ. ТАТВАР ТӨЛӨЛТӨӨРӨӨ ТЭРГҮҮЛЭГЧ-10
“Эрдэнэт үйлдвэр” ТӨҮГ;
“Эрдэнэс Таван толгой” ХК;
“Оюутолгой” ХХК;
“Монголын алт МАК” ХХК;
“ХААН банк” ХК;
“Энержиресурс” ХХК;
“Саусгоби сэндс” ХХК;
“АПУ” ХК;
“Голомтбанк” ХК;
“Худалдаа хөгжлийн банк” ХК.
ХОЁР. ТОМ СЕГМЕНТИЙН ШИЛДЭГ ТАТВАР ТӨЛӨГЧ
“Хангад-Эксплорэйшн” ХХК;
“Хүрэн толгой коал майнинг” ХХК;
“Тавантолгой” ХК;
“Хасбанк” ХК;
“Мобиком корпораци” ХХК;
“Эрдэнэс алт ресурс” ХХК;
“Барло ворлд монголиа” ХХК;
“М Си Эс кока кола” ХХК;
“Трансвест монголиа” ХХК;
“Юнител” ХХК.
ГУРАВ. ДУНД СЕГМЕНТИЙН ШИЛДЭГ ТАТВАР ТӨЛӨГЧ
“Смартложик” ХХК;
“Гофро” ХХК;
“Хонгор баян транс” ХХК;
“Цэцзам пласт” ХХК;
“Премиум палас” ХХК;
“Жавхлант жолоо” ХХК;
“Энхийн шүүдэр” ХХК;
“И Эс Би Би Өү” ХХК;
“Говийн илч тээвэр” ХХК;
“Ихшүүдэргэнэ импорт” ХХК.
ДӨРӨВ. ЖИЖИГ СЕГМЕНТИЙН ШИЛДЭГ ТАТВАР ТӨЛӨГЧ
“Талын алтан жолоо” ХХК;
“Мот капитал” ХХК;
“Тотал экспресс лайн” ХХК;
“АБИКО фүүдс” ХХК;
“Эм Эн иновейшн глобал смарт технологи” ХХК;
“Өнөр механикал трейд” ХХК;
“Хайрхан авто сервис” ХХК;
“Солар повер монголиа” ХХК;
“САММИТ” ХХК;
“Гранд як” ХХК.
ТАВ. БИЧИЛ СЕГМЕНТИЙН ШИЛДЭГ ТАТВАР ТӨЛӨГЧ
“Сэндвик монголиа инженеринг солюшнс” ХХК;
“Номин хайпермаркет баруун бүс” ХХК;
“Фор сийзн гарден” ХХК;
“Москвакомплекс” ХХК;
“СЭТ грийн фьючерс” ХХК;
“Таван богд тек” ХХК;
“Асира” ХХК;
“Коаллайн майнд” ХХК;
“Ганбармат” ХХК;
“Од мөнх амжилтын эхлэл” ХХК юм.
Засгийн газрын 2000 оны тавдугаар сарын 1-ний өдрийн хуралдааны тэмдэглэлийн дагуу жил бүрийн тавдугаар сарын хоёр дахь долоо хоногийг “Татвар төлөгчдийн өдрүүд” болгон зохион байгуулж байхаар шийдвэрлэсэн. Монголын татварын алба уг өдрийг 27 дахь жилдээ “Хэрэгцээнд үндэслэсэн зөвлөгч татварын алба” уриан дор энэ сарын 4-8-ны өдрүүдэд орон даяар тэмдэглэж байна.
