“Багахангай-Хөшигийн хөндий” чиглэлийн салбар төмөр замыг “Улаанбаатар төмөр зам” ХНН-ийн “Багахангай” өртөөнөөс салаалуулан, Төв аймгийн Сэргэлэн сумын урдуур дайруулж, “Чингис хаан” олон улсын нисэх буудлын орчмоос “Эмээлт” өртөөтэй холбохоор төлөвлөж байна.

Зам, тээврийн сайд Б.Дэлгэрсайхан Төмөр замын газар, “Монголын төмөр зам” ТӨХК-ийн удирдлага, инженер техникийн ажилтнуудын бүрэлдэхүүнтэй ажлын хэсгийн хамт “Багахангай-Хөшигийн хөндий” чиглэлийн төмөр замын төслийн ажилтай танилцлаа. Төсөл нь нийслэлийн төвөөр дамжих ачаа тээврийн урсгалыг хотын захаар шилжүүлэх, аюултай ачаа тээврийг нийслэлээс гаргах, иргэдийн аюулгүй байдлыг хангах, авто замын түгжрэлийг багасгах, мөн Хөшигийн хөндийд байгуулах тээвэр, ложистикийн зангилаа бүсийг төмөр замын сүлжээнд холбох стратегийн ач холбогдолтой дэд бүтэц юм.

“Багахангай” өртөөнөөс Хөшигийн хөндийн ложистикийн төв хүртэлх 87.2 км зам, түүнээс “Эмээлт” өртөө хүртэл үргэлжлэх холболтын хэсгийн ажлуудтай танилцахад, төслийн гүйцэтгэл 84-90, далан, ухмалын гүйцэтгэл 98 хувьд хүрснийг ЗТЯ мэдээллээ.

Зам, тээврийн сайд Б.Дэлгэрсайхан “Багахангай” өртөөний өргөтгөл, трассын 38-42 км-т хийж буй гүн ухмалын газар шорооны ажил, 43 болон 66 км-т барьж буй төмөр бетон гүүрийн угсралт, авто замтай огтлолцох хэсэг, “Эмээлт” өртөө хүртэлх бүтээн байгуулалтын явцтай танилцан, чиг үүрэг өглөө. Мөн төслийн бүтээн байгуулалтыг гардан хэрэгжүүлж буй аж ахуйн нэгж, компанийн удирдлагуудтай уулзан, ажлыг эрчимжүүлэх, төлөвлөсөн хугацаанаас өмнө чанартай, хариуцлагатай гүйцэтгэх, тулгамдаж буй асуудлыг газар дээр нь шуурхай шийдэх, мөн санхүүжилтээс үүдсэн хүндрэл чирэгдэл, ажил гацаахгүй гэдгийг онцлон анхааруулжээ.

Төслийн хүрээнд “Багахангай” өртөөнөөс цааш 102 км урт дан зам, 2 өртөө, 4 зөрлөг, 2.5 км орчим урт гүүрэн байгууламж барихаар төлөвлөж, барилгын ажлыг дотоодын 30 гаруй аж ахуйн нэгж 24 цагийн горимоор ажиллаж байгааг компаниудын удирдлагууд хэлж байв.

”Багахангай-Хөшигийн хөндий” чиглэлийн энэ төмөр зам нь Улаанбаатар хотыг шинэ нисэх буудал, тээвэр ложистикийн шинэ төвтэй холбохоос гадна улсын тээврийн сүлжээний шинэ гарц бий болгож, эдийн засгийн эргэлтийг нэмэх стратегийн томоохон бүтээн байгуулалт болохыг Зам, тээврийн сайд онцоллоо.

Тэрбээр “Улаанбаатар төмөр зам” ХНН-ийн “Эмээлт” өртөө дахь замд УБТЗ-ын Оросын талын удирдлагуудтай уулзаж, “Багахангай-Хөшигийн хөндий” чиглэлийн төмөр замын төслийн холболт, техникийн шийдэл, хамтын ажиллагааны талаар санал солилцов. Талууд төслийн холбогдох зураг төсөл, техникийн шийдлийг ирэх долоо хоногт хоёр талаас жигдрүүлэн эцэслэж, шийдэлд хүрч хамтран ажиллахаар тохиролцжээ.