Завхан аймагт ноолуурын үнэ 205 мянган төгрөгт хүрч, улсын хэмжээнд дээгүүр үзүүлэлттэй аймгуудын дөрөвдүгээрт бичигдэж байна.

Үндэсний Статистикийн Хорооны мэдээлснээр, 2026 оны дөрөвдүгээр сарын 27-ны байдлаар ноолуурын үнэ аймгуудаар харьцангуй өндөр түвшинд тогтвортой байна.

Завхан аймгийн хувьд салбарын өмнөх оны үзүүлэлттэй харьцуулахад ноолуурын үнэ өссөн дүнтэй байна. Тодруулбал, 2025 оны ноолуурын улиралд түүхий ноолуурын дундаж үнэ нэг килограмм нь ойролцоогоор 185 мянган төгрөгт хүрч, зарим бүс нутагт 150-190 мянган төгрөгийн хооронд хэлбэлзэж байжээ. Харин энэ жилийн хувьд үнэ өмнөх оныхоос дунджаар 15-20 мянган төгрөгөөр өссөн нь зах зээлийн нөхцөл харьцангуй сайжирч буйг илтгэж байна.

Тус аймаг нь мал аж ахуйн салбарт, тэр дундаа ноолуурын чиглэлийн ямаан сүргийн тоогоороо дээгүүр байр суурь эзэлдэг. Судалгааны дүнгээс харахад тус аймгийн нийт мал сүрэгт ямааны эзлэх хувь сүүлийн жилүүдэд тогтмол өсөх хандлагатай байна.

Түүхэн үзүүлэлтээс авч үзвэл, 1968 онд ямаан сүргийн тоо 236.2 мянгад хүрч буурсан бөгөөд тухайн үед нийт мал сүргийн 15.9 хувийг эзэлж байжээ. Харин 1990-ээд оноос хойш ямаан сүргийн өсөлт эрчимжиж, 2019 онд 1.418.6 мянгад хүрсэн байна. Үүнээс хойш 2023 он хүртэл тодорхой хэмжээнд буурсан хэдий ч сүүлийн хоёр жилд дахин өсөх хандлага ажиглагдаж байгаа талаар Завхан аймгийн Статистикийн хэлтсээс мэдээллээ.

“Завхан-Буурал” үүлдрийн ямааг өсгөн үржүүлэх бодлого баримтлахаар төлөвлөж буй юм. Энэхүү үүлдэр нь ноолуурын гарц сайтай, ширхэг урт, нарийн микронтой, жин ихтэй, сүүний гарц арвин зэрэг ашиг шим хувьд давуу талтай бөгөөд орон нутгийн онцгой брэндэд тооцогддог. Мөн орон нутгийн удирдлагын зүгээс бэлчээрийн болон эрчимжсэн мал аж ахуйг хослуулан хөгжүүлэх, шинэ технологи, инновацыг нэвтрүүлэх зорилтыг дэвшүүлэн ажиллаж буйг аймгийн Засаг дарга Г.Өнөрбаяр онцоллоо.

Одоогийн байдлаар говийн бүсийн сумдад ямаа самнах ажил ид өрнөж байгаа бол зүүн болон хойд бүсийн сумдад самнаж эхлээгүй байна. Жил бүр Завхан аймгийн ноолуур өндөр чанартай, микрон нарийн атлаа зах зээлд харьцангуй хямд үнээр борлуулагддаг талаар малчид шүүмжлэлтэй ханддаг байсан бол энэ жил ноолуурын үнэ өсөж, тогтвортой байгаа нь салбарын хувьд эерэг үзүүлэлт болж байна.