“Малчин кэмп” төсөл Gerbook төсөлтэй хамтран ажиллахаар боллоо.

Энэ нь гурав дахь жилдээ хэрэгжиж буй “Малчин кэмп” төслийг аймгийн хэмжээнд аялал жуулчлалын жишиг санаачилга болгон хөгжүүлэх чухал алхам боллоо.

Энэхүү хамтын ажиллагаа нь нутгийн иргэдэд түшиглэсэн аялал жуулчлалыг (НИТАЖ) хөгжүүлж, дараагийн шатанд гаргах, үйлчилгээний чанар, хүртээмжийг сайжруулах, жуулчдын урсгалыг нэмэгдүүлэх ач холбогдолтой юм.

Аймгийн Засаг дарга Б.Цэрэннадмид энэ удаагийн хамтын ажиллагааг төр, хувийн хэвшлийн түншлэлийн эхлэл болгож, цаашид олон талт хамтын ажиллагааг өргөжүүлэх зорилт тавьж буйгаа илэрхийлсэн юм.

Ийнхүү Архангай аймаг аялал жуулчлалын салбартаа дижитал шийдэл нэвтрүүлж, нутгийн иргэдийн оролцоог нэмэгдүүлсэн тогтвортой хөгжлийн загварыг бий болгох чиглэлд Gerbook-тэй хамтын ажиллагааг эхлүүллээ.

“Малчин кэмп” төсөлд хамрагддаг 60 малчин өрх нь аялал жуулчлалын бүс нутаг бүхий 30 байршилд байрлаж байна.

Gerbook.com нь нутгийн иргэдэд түшиглэсэн аялал жуулчлалыг хөгжүүлэх зорилгын хүрээнд малчин айл өрхийн орлогыг төрөлжүүлж нэмэгдүүлэх, бүтээгдэхүүн үйлчилгээг нь олон нийтэд хүргэх дижитал платформ юм. Энэ сайтаас та Монгол орны 21 аймагт монгол гэрийг онлайнаар захиалж болох юм. Өнөөдрийн байдлаар 900 орчим малчин өрхийг бүртгэжээ.