Галт тэрэгний хөдөлгөөнийг нэгдсэн удирдлага, хяналтад шилжүүлэх Галт тэрэгний хөдөлгөөн зохицуулах нэгдсэн төвийг нээлээ.

Монголд анх удаа галт тэрэгний төвлөрсөн хяналтын систем, хөдөлгөөнийг бодит цагийн горимоор хянах туршилтын систем, аюулгүй байдлын нэгдсэн хяналтын шийдлийг нэвтрүүлж байна. Ингэснээр Сайншанд, Сүхбаатар, Улаанбаатар-2 зэрэг стратегийн чухал өртөөнд RFID, CCTV технологид суурилсан хяналтыг хэрэгжүүлэх боломж бүрдэхийг ЗТЯ мэдээлэв.

ЗТЯ, Сангийн яам, БНСУ-ын Олон улсын хамтын ажиллагааны байгууллага хамтран хэрэгжүүлсэн төслийн барилгын зургийг 2022-2023 онд боловсруулж, барилга угсралтыг 2024 оны 3 дугаар сард эхлүүлснээр Улсын комисст хүлээлгэн өгч ашиглалтад оруулжээ.

Зам тээврийн сайд Б.Дэлгэрсайхан төвийг нээж хэлсэн үгэндээ галт тэрэгний хөдөлгөөнийг нэгдсэн удирдлага, орчин үеийн технологид суурилан зохицуулах нь салбарын аюулгүй байдал, үр ашиг, шуурхай ажиллагааг дээшлүүлэх ач холбогдолтойг дурдаад, “Төмөр замын салбарын урт, дунд хугацааны хөгжлийн бодлогыг хэрэгжүүлэх, галт тэрэгний хөдөлгөөнийг нэгдсэн удирдлагаар хангах, суурь бүтэц хооронд тээврийг удирдлагаар хангах үүрэг бүхий Засгийн газрын хэрэгжүүлэгч агентлаг Төмөр замын газрыг өнгөрсөн онд байгуулсан. Цаашид Төмөр замын газраар дамжуулан, галт тэрэгний хөдөлгөөнийг хянах, удирдах, зохион байгуулах ажлыг дэвшилтэт техник, технологийн тусламжтай хийх, үйл ажиллагааг өргөжүүлэх шат дараатай арга хэмжээ авахаар төлөвлөсөн” гэлээ.

Мөн БНСУ, Монгол Улсын зам тээврийн салбарын хамтын ажиллагаа зөвхөн төмөр замаар хязгаарлагдахгүй, авто болон агаарын тээвэр, логистикийн салбарт улам бүр өргөжиж, авто замын удирдлагын ухаалаг систем нэвтрүүлэх, агаарын тээврийн либералчилал, логистикийн төв байгуулах чиглэлээр төсөл, санал санаачлагыг хамтран хэрэгжүүлэхээ илэрхийлэв.

Төслийн захиалагчаар ЗТЯ, хэрэгжүүлэгчээр Төмөр замын газар ажилласан бол санхүүжилтийг БНСУ-ын Олон улсын хамтын ажиллагааны байгууллага хариуцжээ. Барилгын зураг төслийг “Эм Эс Эл “ХХК, захиалагчийн хяналтыг “КАН” ХХК, барилга угсралтыг “Мандалт констракшн” ХХК болон 100 гаруй инженер, техникийн ажилтан гүйцэтгэжээ.