Ховд аймгийн барилгачдын зөвлөгөөн өнөөдөр боллоо.

Тус аймагт барилга угсралт болон барилгын материал үйлдвэрлэлийн чиглэлээр 400 гаруй аж ахуйн нэгж үйл ажиллагаа явуулж, 1200 гаруй инженер, техникийн ажилтан ажиллаж байна.

Энэ удаагийн зөвлөгөөнд барилгын салбарын инженер, техникийн ажилтан, ахмад барилгачдын төлөөлөл 100 гаруй хүн оролцож, салбарын өмнө тулгамдаж буй асуудал, цаашдын хөгжлийн чиг хандлага, гарц шийдлийг эрэлхийлэв.

Зөвлөгөөнд оролцогчид салбарын хууль эрх зүйн баримт бичиг, санхүүжилтийн хүндрэл, хүний нөөцийн асуудал болон материалын үнэ, нийлүүлэлт, бүтээн байгуулалтын чанар, аюулгүй байдал, хяналтыг сайжруулахад анхаарах шаардлагатай талаар санал хэллээ.

Тус зөвлөгөөнийг Газрын харилцаа, барилга, хот байгуулалтын газраас бусад холбогдох байгууллагын төлөөлөлтэй хамтран зохион байгуулсан бөгөөд "Хот байгуулалтын ерөнхий төлөвлөгөө", "Барилгын материал үйлдвэрлэл" гэсэн агуулгын хүрээнд хэлэлцүүлэг өрнүүлсэн юм. Энэ үеэр захиалагчийн хяналт, инженерийн дэд бүтэц, барилгын материал үйлдвэрлэл, хот байгуулалтын кадастр, нэгдсэн мэдээллийн системийн талаар илтгэл танилцуулжээ.

Ташрамд, Ховд аймгийн хэмжээнд энэ онд улсын болон орон нутгийн төсөв, хувийн хэвшлийн байгууллагын хөрөнгө оруулалтаар 130 гаруй төсөл, үйл ажиллагаа хэрэгжүүлж байна. Үүнээс улсын төсвийн хөрөнгө оруулалтаар 35, орон нутгийн төсвөөр 78 төсөл, үйл ажиллагаа хэрэгжиж буй. Мөн хувийн хэвшлийн байгууллагын хөрөнгө оруулалтаар 650 айлын орон сууц, үйлчилгээний төвийн барилга угсралтын ажил гүйцэтгэж байна.