Өнөөдрийн Засгийн газрын хуралдаанаар хөдөө аж ахуйн салбарт хэрэгжүүлэх хэд хэдэн шийдвэр гаргажээ.

Газар тариалангийн салбарын хэвийн үйл ажиллагааг хангах, цаашдын тогтвортой хөгжлийг дэмжих асуудалд онцгой анхаарал хандуулахаар болсныг Хүнс, хөдөө аж ахуй, хөнгөн үйлдвэр сайд Ц.Идэрбат онцоллоо.

Тэрбээр ярихдаа, “Засгийн газрын тогтоол болон албан даалгавар гарсан. Энэ нь хүнсний ногооны хангалтыг сайжруулах, нэмэгдүүлэх чиглэл бүхий цогц агуулгатай. Энэ хүрээнд газар тариалангийн салбарт хэд хэдэн томоохон шийдвэр гарсан. Тухайлбал, газар зохион байгуулалтыг шинэчилж, хүнсний ногоо тариалагчдад Монгол Улсад мөрдөж буй газрын тухай хуульд заасан эрхүүдийг бүрэн эдлүүлэх ажлыг эрчимжүүлэх үүргийг нийслэл болон аймгийн Засаг дарга нарт өглөө. Мөн үүсээд буй нөхцөл байдалтай холбоотой хүнсний ногооны хүртээмж, чанарыг сайжруулах зорилгоор нэг тэрбум төгрөгийн санхүүжилтийг шийдвэрлэв. Энэ хөрөнгөөр дөрвөн төрлийн хүнсний ногооны үрийг худалдан авч тариаланчдад хөнгөлөлттэй үнээр, зээлийн нөхцөлөөр олгоно. Хэдийгээр 1 тэрбум төгрөгийн үр гэж байгаа ч тариаланчдын гар дээр очиж, хөрсөнд шингээд ургац болон гарч ирэхдээ нийтдээ 19 мянган тонн хүнсний ногоо тариалах боломжтой гэж үзэж байна. Түүнчлэн Засгийн газар зуны болон өвлийн хүлэмжийн аж ахуйд онцгой анхаарахаар шийдвэрлэлээ. Зуны хүлэмжийн хувьд 2.1 тэрбум төгрөгийн худалдан авалт хийж, энэ төрлийн ахуй эрхлэх иргэдэд хүүгүй, урт хугацааны зээл олгоно. Харин өвлийн хүлэмжийн гол хүндрэл болох халаалтын асуудлыг цахилгаанаар шийддэг тул цахилгааны үнийн хөнгөлөлт үзүүлэхээр болж, нийтдээ 400 сая гаруй төгрөгийн дэмжлэг олгохоор болсон” гэв.

Түүнчлэн хаврын тариалалтад шаардлагатай 10 мянган тонн шатахууныг одоогийн үнээс хямдруулан нийлүүлэх шийдвэр гаргажээ. Энэ хүрээнд үүссэн санхүүгийн хүндрэлээ салбар дотроо зохицуулж, шатахууны санхүүжилтийн асуудлыг шийдвэрлэхээр болсон бөгөөд 2026 оны төсвийн багцаас 16 тэрбум орчим төгрөгийг шийдвэрлэж, хаврын тариалалтыг хэвийн явуулах нөхцөлийг бүрдүүлж байгааг салбарын сайд нь онцоллоо.

Энэ талаар Ц.Идэрбат сайд, “Хаврын тариалалт тавдугаар сард эхэлж, намар ургац хураадаг онцлогтой учраас намрын тариалалтад шаардлагатай техник, материалын бэлтгэлийг одооноос хангах чиглэлд анхаарч, Аж үйлдвэр, эрдэс баялгийн яамтай хамтран ажиллахаар болсон. Үүнээс гадна Монголбанктай холбоотой зөвлөмж гарсан. Тодруулбал, 130 тэрбум төгрөгийн зээлийн эх үүсвэрийг шуурхай олгох шаардлагатай байгаа. Учир нь, аж ахуйн нэгжүүд арилжааны банкуудад хандахад эх үүсвэргүй гэх шалтгаанаар зээл олдохгүй байгаа талаар гомдол ирсэн. Дархан хотод болсон уулзалтаар ч энэ асуудлыг хөндөж байна. Иймээс ган, байгалийн давагдашгүй хүчин зүйлээс шалтгаалан санхүүгийн хүндрэлд орсон аж ахуйн нэгжүүдэд уян хатан нөхцөлөөр хандахыг Монголбанкны ерөнхийлөгчид зөвлөмж өгсөн. Мөн хөдөө аж ахуйн салбарын экспортын асуудалд анхаарч, Монгол Улс Евро-Азийн бүсийн таван улстай байгуулсан худалдааны хэлэлцээрийн боломжийг илүү ашиглах чиглэл баримтална” гэв.

Үүнээс гадна нийслэлийн махны хангамжид төрөөс оролцож байгаа үндсэн хэлбэр болох нөөцийн махны бүрдүүлэлт хийсэн бөгөөд цаашид түгээлтийн үйл ажиллагаанд анхаарах чиглэл өгсөн байна.