“Оюу толгой” компанийн хөрөнгө оруулалттай “Говийн оюу хөгжлийг дэмжих сан”-гийн удирдах зөвлөл энэ оны гуравдугаар сарын 24-ний өдөр хуралдаж, Өмнөговь аймагт хэрэгжих томоохон төслүүдийг хэлэлцжээ.

Тодруулбал, Өмнөговь аймгийн ЗДТГ болон Оюу толгой компанийн хамтын ажиллагааны гэрээний харилцааны хорооны хурлаар хэлэлцсэн төслийн саналуудыг хэлэлцэж, “Говийн оюу хөгжлийг дэмжих сан”-гийн санхүүжилтээр дараах 8 төсөл, хөтөлбөрүүдийг энэ онд санхүүжүүлэхээр шийдвэрлэлээ.

Өмнөговь аймгийн нийгмийн эрүүл мэндийг дэмжих төв, эрүүл мэндийн газрын барилга барих, хүүхдийн паркийн ерөнхий төлөвлөгөөний дагуу барилга, байгууламж, тоног төхөөрөмж суурилуулах, Буянт хотхон хүүхдийн зусланд усан оргилуур, задгай театр барих, Өмнөговь аймгийн Даланзадгад суманд шинээр барих 50МВт-ын дулааны цахилгаан станцыг эрчим хүчний нэгдсэн системд холбогдох зураг төсөл боловсруулах, “Боловсрол Өмнөговь” 2024-2028 онд 5 жилийн хугацаанд хэрэгжих боловсролын хөтөлбөрийн санхүүжилт, “Өмнөговь аймгийн иргэдийн эрүүл мэндийг дэмжих” 2024-2028 онд 5 жилийн хугацаанд хэрэгжих эрүүл мэндийн салбарын цогц хөтөлбөрийн санхүүжилт, Байгаль орчны шинжилгээний говийн бүсийн төв лабораторт шаардлагатай тоног төхөөрөмжөөр хангах, Соёлын түүх дурсгалт газруудад кадастр хийлгэх зэрэг төслийг нийт 12.5 тэрбум төгрөгөөр санхүүжүүлэхээр болжээ.

Үүнээс онцлох төслүүдийг дурдвал, нийгмийн эрүүл мэндийн төвийн барилгыг нь батлагдсан зураг төсвийн дагуу 13.3 тэрбум төгрөгөөр санхүүжүүлэхээс 2026 онд 5.5 тэрбум төгрөгөөр, шинээр барих 50МВт-ын дулааны станцын нийт 5 томоохон зураг төсөл хийлгэхээс хоёрыг нь “Говийн оюу хөгжлийг дэмжих сан”-гаас тус тус санхүүжүүлэхээр төлөвлөжээ.