Монгол Улсын Засгийн газар, АНУ-ын Мянганы сорилтын корпорац хооронд байгуулсан II Компакт гэрээ буюу Усны Компактын хэрэгжилтийн таван жилийн тоолуур дуусаж, үр дүнгээ хэлэлцлээ.

Төслийн хүрээнд Монголын анхны томоохон Хаягдал ус дахин боловсруулах үйлдвэрийг албан ёсоор нээж, цэвэр усыг хэмнэх, дулааны цахилгаан станцуудыг техникийн усаар хангах шинэ боломж бүрдүүлэв. Энэ нь Монгол Улсын эрчим хүчний салбарт дахин боловсруулсан ус ашиглах анхны томоохон туршлага болоод зогсохгүй, цаашид аж үйлдвэрлэлийн бусад олон салбарт дахин боловсруулсан усны хэрэглээг нэвтрүүлэх, гүний усны нөөцөө хэмнэж, ирээдүй хойчдоо хадгалж үлдээх, Туул голын экосистемийг тэтгэх үнэлж баршгүй ач холбогдолтой юм. Төслийн үр дүнд манай улсын усны бодлогын нэгэн томоохон зорилт биеллээ олж байгаа бөгөөд ус хангамжийн цоо шинэ эх үүсвэрийг бий болгож байна.

Түүнчлэн “Ус хангамжийн баруун эх үүсвэрийг шинээр байгуулах” төслийн хүрээнд анхны Ус гүн цэвэршүүлэх үйлдвэрийг байгуулжээ. Энэхүү үйлдвэрийн туршилт тохируулга үргэлжилж байгаа бөгөөд ирэх сард нээлтээ хийх аж. Улаанбаатар хотын иргэд одоогоор цэвэр усны долоон эх үүсвэрээс жилдээ 55 сая шоо метр ус авч хэрэглэдэг. Тэгвэл энэхүү үйлдвэр ашиглалтад орсноор жилд 50 хүртэл сая шоо метр усыг төвийн шугамд нийлүүлэх юм. Ингэснээр нийслэлийн ус хангамжийг баталгаажуулах, хот баруун тийш өргөжин тэлэх, эдийн засгийн өсөлтийг дэмжихэд томоохон хувь нэмрийг оруулна.

Мөн Улаанбаатар хотын ус хангамжийн тогтвортой байдлыг бататгахад чиглэсэн зөөлөн дэд бүтцийн төслийг хэрэгжүүлсэн байна. Энэ хүрээнд усны салбарын институтийн тогтолцоо, хууль, эрх зүйн орчин, бодлого зохицуулалтыг сайжруулах, салбарын байгууллагуудын чадавхыг бэхжүүлж, техникийн туслалцаа үзүүлэх, үйлдвэрүүдийг цаашид авч явах УСУГ-ын санхүүгийн болон хүний нөөцийн чадавхыг сайжруулахад чиглэсэн техникийн туслалцаа үзүүлэх таван дэд төсөл, үйл ажиллагааг амжилттай хэрэгжүүлж дуусаж байгаа юм. Ийнхүү Монгол Улсын усны салбарт сүүлийн 30 жилийн хамгийн том хөрөнгө оруулалт бодит үр дүнд хүрч, Улаанбаатар хотын ус хангамжийг шинэ шатанд гаргасан стратегийн ач холбогдолтой төсөл амжилттай хэрэгжиж өндөрлөлөө.

Ташрамд дурдахад, 2021 оны гуравдугаар сарын 31-ний өдөр хүчин төгөлдөр болж, таван жилийн тоолуураа эхлүүлж байсан Усны Компактын төсөл, хөтөлбөр ийнхүү товлосон хугацаа, батлагдсан төсөвтөө бүрэн нийцүүлэн амжилттай хэрэгжив.