Гуравдугаар сарын 29-нд зохион байгуулах "Монгол ноолуур-2026" дуудлага худалдаанд үндэсний үйлдвэрлэгч 13 компани оролцохоо мэдэгджээ.

Үүнд Говь, Кашмер холдинг, Ханбогд, Хатан, Өгөөж шим, Баялаг өлзий, Сор кашмер зэрэг ноос ноолуураар түүхий эд болон эцсийн бүтээгдэхүүн бэлтгэдэг томоохон цогцолбор үйлдвэрүүд багтжээ.

Монгол Улсын Ерөнхийлөгчийн "Цагаан алт" хөтөлбөрийн хүрээнд малын гаралтай түүхий эдийн үнийг нэмэгдүүлэх, үндэсний үйлдвэрлэлийг дэмжих зорилгоор ноолуурын дуудлага худалдаа зохион байгуулах бэлтгэл ажил хийж байна. Үүнд Монголын ноос, ноолуурын холбооны ажлын баг оролцож байна.

Хоёр өдрийн турш малчид, хоршоодод түүхий эдээ хэрхэн ангилан ялгах, шошгожуулах арга, мөн үндэсний үйлдвэрүүдэд өндөр үнээр чанартай түүхий эд нийлүүлэх тухай мэдлэг олгох онолын сургалтыг зохион байгуулж байна. Маргааш онолын мэдлэгээ малчны хотонд очиж дадлагаар турших бөгөөд үүний үр дүнд хоршоо, үйлдвэрлэгч компаниудын хооронд түншлэлийн гэрээ байгуулна. Ноолуурыг урьдчилж агуулахад хурааж, үйлдвэрлэгчдэд танилцуулж байгаа үйл явц нь үнийн дүнд нөлөөлөхгүй гэдгийг Монголын ноос, ноолуурын холбооны Баталгаажуулалтын албаны дарга Ц.Туяа онцоллоо.