Зам, тээврийн сайд Б.Дэлгэрсайхан Япон Улсаас Монгол Улсад суугаа Элчин сайд Игавахара Масарүг хүлээн авч уулзан, “Чингис хаан” олон улсын нисэх буудлын өргөтгөл, хүчин чадлыг нэмэх төслийн талаар ярилцав.
Сайд Б.Дэлгэрсайхан Япон Улсад энэ сарын 2-8-нд хийсэн албан айлчлалын үр дүнг танилцуулжээ. Энэ үеэр “Чингис хаан” нисэх буудлын дэд бүтэц, өргөтгөл, нисэх буудлын менежмент, аюулгүй ажиллагаа, хүний нөөцийн чадавхыг бэхжүүлэх чиглэлээр олон ажил хэрэгч уулзалт хийж, харилцан ойлголцолд хүрснээ тэмдэглэснийг ЗТЯ мэдээллээ.
Японы Засгийн газраас Монголд олгож буй иенийн хөнгөлөлттэй зээлийн хүрээнд хэрэгжих дээрх төслийн бүтээн байгуулалтыг эрчимжүүлж, төслийг аль болох богино хугацаанд эхлүүлэх, талуудын уялдаа холбоог сайжруулах нь манай улсын аялал жуулчлал, агаарын тээврийн салбарын өсөлтийг дэмжих ач холбогдолтойг сайд онцолсон юм.
Элчин сайд Игавахара Масарү Зам тээврийн сайд Б.Дэлгэрсайханыг Япон Улсын “Ханэда” олон улсын нисэх буудлын Токио дахь ачаа тээврийн терминал (TIAC)-ын бүтэц, зохион байгуулалт, үйл ажиллагаатай танилцаж, туршлага солилцсонд талархал илэрхийлж, Монгол Улс “Чингис хаан” нисэх буудлын карго терминалыг амжилттай барина гэдэгт итгэлтэй байгаагаа хэлэв.
Мөн “Чингис хаан” нисэх буудлын өргөтгөлийг хоёр улсын Засгийн газрын тохиролцсон зээлийн хэмжээнд багтаан барих, төслийг богино хугацаанд хэрэгжүүлэх, бүтээн байгуулалтыг эрт эхлүүлэх үүднээс барилгын төлөвлөлт, судалгааг эрчимжүүлэхэд Элчин сайд анхаарал хандуулахаа онцон тэмдэглэжээ.
