ЭЗХЯ-ны дэргэдэх Хөрөнгө оруулагчдын эрх ашгийг хамгаалах төвд “Японы хөрөнгө оруулалтын өдөр”-ийг зохион байгууллаа.

ЭЗХ-ийн дэд сайд С.Даваасүрэн, “Японы хөрөнгө оруулалтын өдөр” нь дараагийн бодит үр дүнтэй хамтын ажиллагааны эхлэл болж, Монгол, Японы Тусгай стратегийн түншлэлийг эдийн засгийн агуулгаар баяжуулах боломжийг нээнэ хэмээн онцолсныг ЭЗХЯ мэдээлэв.

Цаашид сэргээгдэх эрчим хүч, эрчим хүчний шилжилтийг эрчимжүүлэх, чухал ашигт малтмал, хөдөө аж ахуйн салбарт нэмүү өртөг шингэсэн үйлдвэрлэлийг хөгжүүлэх, дэд бүтцийн тогтвортой байдлыг хангахад Японы дэвшилтэт технологи, чанар стандарт, менежментийг нэвтрүүлэх нь чухлыг оролцогчид хэлж байлаа. Мөн гадаад худалдааны боломжийг нэмэх, экспортын зах зээлийг тэлэхэд Монгол Улсын Засгийн газар худалдааны хэлэлцээрүүд байгуулахад онцгой ач холбогдол өгч байгааг тэмдэглэсэн юм.

Монгол, Япон улс “Энх тайван, хөгжил цэцэглэлтийн төлөөх Тусгай стратегийн түншлэл”-ийн хүрээнд хамтын ажиллагаагаа өргөжүүлж, эдийн засаг, хөрөнгө оруулалт нь түншлэлийн чухал тулгуур болж байгаа. Засгийн газраас хөрөнгө оруулагчдад тогтвортой, ил тод, урьдчилан таамаглах боломжтой орчин бүрдүүлэхэд анхаарч, Эдийн засгийн эрх чөлөөний тухай хууль, Хөрөнгө оруулалтын тухай хуульд нэмэлт, өөрчлөлт оруулах тухай хуулийн төсөл, Зөвшөөрлийн тухай хуулийн шинэчилсэн найруулгыг боловсруулж байна.

Япон Улсаас Монгол Улсад суугаа Онц бөгөөд Бүрэн эрхт Элчин сайд Игавахара Масарү хэлсэн үгэндээ Элчин сайдын яам Монгол, Японы бизнес эрхлэгчдийн гүүр болж, үр ашигтай хамтын ажиллагаа, тогтвортой эрх зүйн орчныг бүрдүүлэхэд нягт хамтран ажиллахаа илэрхийлэв.

Японы талаас татварын орчны тогтвортой, урьдчилан таамаглах боломжтой байдлыг хангах, гадаадын хөрөнгө оруулагчдад үзүүлэх татвар, бодлогыг сайжруулах, хөрөнгө оруулалтын урамшууллын механизмыг тодорхой болгох шаардлагатайг онцолсон. Уул уурхайн чиглэлийн хамтын ажиллагааг гүнзгийрүүлэх, ноос, ноолуурын салбарт B2B уулзалтыг тогтмол хийх, тоног төхөөрөмжийн санхүүжилт, экспортын даатгалын механизмыг илүү уялдаа холбоотой хөгжүүлэх санал дэвшүүлээд, дэд бүтцийн томоохон төслүүдэд оролцоход тулгарч буй бэлтгэл үе шатны хугацаа, өндөр шаардлага, шалгуурыг хөндөн, хамтын ажиллагааг сайжруулахад уялдаа, зохицуулалт хэрэгтэйг дурджээ.

Япон Улс манай гадаад худалдааны бараа эргэлтийн 4.1, экспортын 0.1, импортын 9.6 хувийг эзэлдэг. Өнгөрсөн оны эхний хагас жилд тус улсаас 1.7 тэрбум ам.долларын шууд хөрөнгө оруулсан нь гадаадын нийт хөрөнгө оруулалтын 3.5 хувийг бүрдүүлж байна.

“Японы хөрөнгө оруулалтын өдөр” нь хоёр улсын эдийн засгийн хамтын ажиллагааг шинэ шатанд гаргах, харилцан ойлголцол, итгэлцлийг бэхжүүлэх, бодит төслүүдийг урагшлуулахад түлхэц болох зорилготой юм.