АҮЭБЯ, Монголын Уул Уурхайн Үндэсний Ассоциаци уул уурхайн салбарт гадаадын хөрөнгө оруулалтыг нэмэх, стратеги, капиталын уялдааг бэхжүүлэхээр "Mining Week & MinePro 2026" Лондон хот дахь үйл ажиллагааг өчигдөр зохион байгуулав.

АҮЭБ-ийн сайд Г.Дамдинням энэ үеэр Монголын уул уурхайн салбарын бодлого, эрх зүйн орчин, хөрөнгө оруулалтын орчны шинэчлэл, стратегийн чиг хандлагыг онцлоод, энэ салбарт тогтвортой хөгжил, ил тод байдал, олон улсын стандарт, урт хугацааны хөрөнгө оруулалтыг дэмжих бодлого хэрэгжүүлж байгааг тэмдэглэснийг тус яам мэдээлжээ.

МУУҮА, аж ахуйн нэгжийн төлөөлөл, Их Британид төвтэй санхүүгийн болон олон улсын санхүүгийн байгууллага, институцийн хөрөнгө оруулагч, капиталын зах зээлийн мэргэжилтэн, уул уурхайн салбарын төлөөлөл оролцож, санал солилцов. Энэ хүрээнд "Стратегиас капитал руу” панел хэлэлцүүлэг, уул уурхайн төслүүдийн танилцуулга, зах зээлийн хэлэлцүүлэг өрнүүлж, мөн хөрөнгө оруулагчидтай В2В уулзалт зохион байгууллаа.

Мөн өдөр АҮЭБ-ийн сайд Г.Дамдинням Европын сэргээн босголт, хөгжлийн банк (ЕСБХБ)-ны Тэргүүн дэд ерөнхийлөгч Грег Гайеттай уулзаж, Монгол Улс, ЕСБХБ-ны хооронд уул уурхайн салбарт хамтран ажиллах асуудлаар ярилцжээ. Энэ үеэр ЕСБХБ-наас Монгол Улсын Засгийн газраас хэрэгжүүлэхээр төлөвлөж буй аж үйлдвэрийн томоохон төслүүдэд хамтран ажиллах сонирхлоо илэрхийлсэн байна.

Монгол Улсын нутаг дэвсгэрт геологийн бүрэн суурь судалгаа хийж, цахимжуулах чиглэлээр хамтран ажиллахаар тохиролцов. Ташрамд дурдахад, ЕСБХБ нь 2006 оноос манай улсад 166 төсөлд 2.5 тэрбум гаруй еврогийн санхүүжилт олгожээ.

Түүнчлэн сайд Г.Дамдинням Их Британийн Бизнес, худалдааны яамны Аж үйлдвэрийн асуудал хариуцсан сайд Крис Макдоналдтай Лондон хотноо уулзаж, 2024 онд байгуулсан Монгол-Их Британийн хооронд байгуулсан уул уурхайн салбарт хамтран ажиллах санамж бичгийг хэрэгжүүлэх хүрээнд хоёр орны яамдын хамтарсан ажлын хэсэг байгуулахаар тохиролцов. Мөн Монгол Улсын геологийн суурь судалгааг хамтарч хийх санхүүжилт гаргах, мэдээлэл солилцох, мэргэжилтэн бэлтгэхэд хамтран ажиллах боломжийг эрэлхийлэхээр болжээ.