Эдийн засаг, хөгжлийн дэд сайд С.Даваасүрэн Дэлхийн банкны Монгол Улс хариуцсан менежер бөгөөд Монгол Улс дахь суурин төлөөлөгч Таехюн Ли болон тус банкны Байгаль орчны багийн төлөөлөгчидтэй уулзав.

Энэ онд Монгол Улсад зохион байгуулагдах НҮБ-ын Цөлжилттэй тэмцэх тухай конвенцын Талуудын 17 дугаар бага хурал (COP17)-ын хүрээнд хэрэгжүүлэх хамтын ажиллагааны талаар санал солилцлоо.

Уулзалтын эхэнд дэд сайд С.Даваасүрэн Монгол Улсын Засгийн газраас бизнес, хөрөнгө оруулалтын орчныг сайжруулах чиглэлээр авч хэрэгжүүлж буй хууль, эрх зүйн шинэчлэлүүд, мөн ногоон хөгжлийн бодлогын хүрээнд хэрэгжүүлж буй тэргүүлэх зорилт, арга хэмжээний талаар мэдээлэл өглөө. Тэрбээр эдгээр бодлого нь уур амьсгалын өөрчлөлтийн сорилтыг эдийн засгийн боломж болгон хувиргах, тогтвортой өсөлтийг хангах үндэс суурь болж байгааг онцолсон юм.

Дэлхийн банкны төлөөлөгчид COP17 нь Монгол Улсын хувьд олон улсын түвшинд бодит "өв" үлдээх, уур амьсгалын болон ногоон санхүүжилтийг татах стратегийн чухал боломж гэдгийг тэмдэглэв. Энэ хүрээнд хиймэл оюун ухаан, дэвшилтэт технологид суурилсан хүлэмжийн хийн ялгарлыг хэмжих, хянах, тайлагнах тогтолцоог хөгжүүлэх, бэлчээрийн менежмент, байгальд суурилсан шийдлүүдийг бодлого, хөрөнгө оруулалтын түвшинд нэвтрүүлэх боломжийг онцоллоо.

Түүнчлэн Олон улсын санхүүгийн корпорац (IFC)-аар дамжуулан хувийн хэвшлийн хөрөнгө оруулалтыг уур амьсгал, ногоон хөгжлийн төслүүдэд чиглүүлэх санхүүгийн шинэ хэрэгслүүдийг хамтран судлах, санхүүжилтийн холимог загварыг хөгжүүлэх боломжтойг Дэлхийн банкны зүгээс дурдав.

Уулзалтын үеэр COP17-ийн бэлтгэл ажлыг Монгол Улсын хөгжлийн бодлого, эдийн засгийн дунд хугацааны төлөвлөлттэй уялдуулан хэрэгжүүлэх, олон улсын түншлэл, санхүүжилтийг оновчтой татах замаар байгаль орчин, эдийн засагт бодит үр өгөөжтэй төслүүдийг хэрэгжүүлэх нь чухал гэдэгт талууд санал нэгдлээ.

Цаашид талууд COP17-ийн хүрээнд хамтран хэрэгжүүлэх боломжтой төслийн чиглэл, хамтын ажиллагааны саналуудыг нарийвчлан боловсруулж, техникийн түвшинд уялдаа холбоотой ажиллан, бодитой үр дүнд хүрэхээр тохиролцов гэж Эдийн засаг, хөгжлийн яамнаас мэдээллээ.