АНУ татвараа бууруулсны хариуд Өмнөд Солонгосын тал 350 тэрбум ам.долларын хөрөнгө оруулахыг зөвшөөрсөн гэж АНУ-ын Ерөнхийлөгч Дональд Трамп "Truth Social" нийгмийн сүлжээний хуудсандаа мэдэгджээ. 

Үүнээс гадна, Өмнөд Солонгос Америкийн газрын тос, хийг “асар их хэмжээгээр” худалдаж авахыг зөвшөөрсөн гэж тэрбээр мэдэгдсэн байна. “Өмнөд Солонгосын чинээлэг компаниуд болон бизнес эрхлэгчдийн манай улсад хийх хөрөнгө оруулалт 600 тэрбум ам.доллароос давна. Хоёр улсын цэргийн холбоо урьд өмнөхөөсөө илүү хүчтэй болсон тул би тэдэнд зориулж хуучирсан, маневрлах чадвар багатай дизель хөдөлгүүртэй шумбагч онгоцных нь оронд цөмийн хөдөлгүүрт шумбагч онгоц үйлдвэрлэхийг зөвшөөрсөн” гэж АНУ-ын Ерөнхийлөгч мэдэгджээ.

Д.Трамп Зүүн Азийн орнуудаар хийж буй таван өдрийн айлчлалынхаа хүрээнд аравдугаар сарын 29-ний лхагва гарагт Өмнөд Солонгост хүрэлцэн ирж, Ерөнхийлөгч Ли Жэ Мёнтэй уулзсан юм. Хоёр удирдагч худалдааны гэрээний нарийн ширийн асуудлуудыг хэлэлцжээ.

Өмнөд Солонгосын бараа бүтээгдэхүүнд ногдуулах хамгийн хатуу тарифыг бууруулах нөхцөлтэйгөөр АНУ-д 350 тэрбум ам.долларын хөрөнгө оруулахаар тохиролцсоноо талууд долоодугаар сарын сүүлчээр зарласан юм. Гэсэн хэдий ч эдгээр хөрөнгө оруулалтын бүтцийн талаарх хэлэлцээ мухардалд ороод байжээ.

Эцэст нь Трамп, Ли нар тохиролцож, Өмнөд Солонгосын тал амласан 350 тэрбум ам.долларын хөрөнгө оруулалтын сантай холбоотой асуудлыг шийдвэрлэв. Үүний 200 тэрбум ам.долларыг бэлнээр хэсэгчлэн гаргах бөгөөд жилд 20 тэрбум ам.доллароор хязгаарлагдана. Харин үлдсэн 150 тэрбум ам.долларыг Өмнөд Солонгосын тал сэргээхээр амласан хөлөг онгоцны үйлдвэрлэлд хөрөнгө оруулах ажээ.

Өмнөд Солонгосын талын мэдэгдсэнээр, эхний хөрөнгө оруулалтын зардлыг нөхөх хүртэл ашиг орлогыг тэнцүү хуваахаар, мөн зөвхөн ашигтай бизнесийн төслүүдийг хөгжүүлэхээр тохиролцжээ. АНУ-ын Худалдааны сайд Ховард Лютник хөрөнгө оруулах төслүүдийг үнэлэх комиссыг удирдана.

Ли Жэ Мён зочиндоо улсынхаа хамгийн дээд шагнал болох “Мүгүнхва” одон болон эртний Шилла хаант улсын алтан титмийн хуулбарыг бэлэглэжээ.

"Алтан амттан"-аар өндөрлөсөн үдийн зоогийн эхэнд Ли батлан ​​​​хамгаалахын зардлыг нэмэгдүүлэхээ амлаж, АНУ-ын холбоотнууд цэргийн үүргээ биелүүлэхгүй байгаа гэсэн Трампын санаа зовнилыг арилгав.

Тэрбээр мөн шумбагч онгоцонд ашиглахын тулд цөмийн түлш боловсруулахыг зөвшөөрөхийг Трампаас хүсжээ. Хоёр улсын хооронд байгуулсан гэрээний дагуу Өмнөд Солонгосын тал АНУ-ын зөвшөөрөлгүйгээр цөмийн түлш боловсруулах эрхгүй ажээ.

Трамп Умард Солонгостой холбоотой асуудлыг “шуурхай шийдвэрлэхэд” нь Өмнөд Солонгост туслахаа  амлажээ. 

Эх сурвалж: Kazinform