Хөдөлмөр, халамжийн үйлчилгээний ерөнхий газар Өвөрхангай аймгийн ЗДТГ болон Хөдөлмөр, халамжийн үйлчилгээний газартай хамтран Хангайн бүсийн шилдэг “Старт ап” шалгаруулах арга хэмжээг Өвөрхангай аймагт зохион байгууллаа.
Архангай, Баянхонгор, Өвөрхангай аймгийн старт ап бизнесийн чиглэлээр шалгарсан 12 баг оролцож, шинэлэг санаагаа танилцуулан өрсөлдсөнөөс Баянхонгор аймгийн Э.Сэмбэсүрэнгийн удирдсан “Green Cycle” баг тэргүүн байр эзэлж 20 сая төгрөгийн санхүүгийн дэмжлэг авсан байна. Хоёрдугаар байрт Өвөрхангай аймгийн “Candella” (гар урлал, саван, лаа үйлдвэрлэл), гуравдугаар байрт Баянхонгор аймгийн Т.Нацагпүрэвийн “GOJI” (цэвэр усны савны үйлдвэрлэл) багууд тус тус шалгарч, 17 болон 15 сая төгрөгийн урамшуулал хүртжээ.
Тус арга хэмжээ нь залуусын шинэлэг бизнес санааг дэмжих, гарааны бизнесийг хөгжүүлэх зорилготой бөгөөд өмнө нь есдүгээр сард Баянхонгор аймагт “Старт ап-2025” хөтөлбөр амжилттай хэрэгжиж, шилдэг таван багийг энэ бүсийн уралдаанд оролцох эрхээр шагнасан юм.
Эх сурвалж: Хөдөлмөр, халамжийн үйлчилгээний ерөнхий газар
