Хөвсгөл аймагт “Дархан нэхий” хувьцаат компани түүхий эд бэлтгэлийн анхан шатны бааз байгуулж, наймдугаар сараас эхлэн малчдын арьс, ширийг худалдан авч эхэлсэн байна. Хоёр сарын хугацаанд 30 мянган хонины нэхий, 2000 гаруй үхрийн ширийг аймгийн малчид нийлүүлжээ.

Тус бааз байгуулагдсанаар орон нутгийн түүхий эдийг үнэд хүргэх, малчдын орлого нэмэгдүүлэх, арьс шир хаягдал багасгах зэрэг олон талын ач холбогдолтой гэж үзэж байна. “Нэхий таннер” ХХК-ийн гүйцэтгэх захирал Я.Аззаяа хэлэхдээ, малчид арьс ширээ гэмтээлгүйгээр, зөв өвчиж авах нь чухал бөгөөд урин дулааны улиралд давсалж анхан шатны чанарын хамгаалалт хийсний дараа нийлүүлэх шаардлагатай гэж онцоллоо.

Ийнхүү орон нутагт түүхий эд бэлтгэлийн бааз байгуулагдсанаар “Дархан нэхий” чанартай арьс, шир нийлүүлэлтээ нэмэгдүүлж, дотоодын боловсруулах үйлдвэрийн бүтээгдэхүүний чанарыг дээшлүүлэх нөхцөл бүрдэж байна.