Mining сайтын мэдээлснээр, “Рио Тинто” группийн охин компани “Оюутолгой” ХХК Монгол дахь зэсийн олборлолтын үйл ажиллагаатай холбоотой авлигын шинжтэй, ёс зүйгүй үйлдэл илэрсэн байж болзошгүй нөхцөлд дотоод мөрдөн шалгалт эхлүүлжээ. Тус компани уг асуудлаар хууль сахиулах байгууллагуудтай хамтран ажиллах хүсэлт илэрхийлсэн байна.
“Худалдан авах үйл ажиллагаатай холбоотой зөрчил илэрсэн талаар мэдээлэл авсны дараа бид дотоод шалгалт явуулж байгаа бөгөөд мөрдөн шалгах ажиллагаа үргэлжилж байгаа тул одоогоор дэлгэрэнгүй мэдээлэл өгөх боломжгүй” хэмээн “Оюутолгой” ХХК мэдэгдэлдээ дурджээ.
“Оюутолгой” компанийн 66 хувийг эзэмшдэг “Рио Тинто” нь далд уурхайн үйл ажиллагааг удирддаг бөгөөд 2030 он гэхэд тус уурхайг дэлхийн дөрөв дэх том зэсийн уурхай болгохоор зорьж байна. Үлдсэн 34 хувийг Монголын Засгийн газар эзэмшдэг.
“Рио Тинто”-гийн хувьд “Оюутолгой” нь хамгийн үнэ цэнтэй хөрөнгө оруулалт бөгөөд сүүлийн улиралд олборлолт 78 хувиар өссөн ч улс төрийн тогтворгүй байдал, зардлын өсөлт, саатал зэрэг асуудалд өртөөд буйг мэдээлжээ.
Зэс нь тус компанийн төмрийн хүдрээс хамаарлыг бууруулах, цахилгаанжуулалт болон дата төвүүдийн өсөлттэй холбоотой эрэлт нэмэгдэж буй нөхцөлд гол стратегийн метал болж байгаа юм.
Эх сурвалж: Mining.com.
