АНУ болон Хятадын хооронд үүсээд буй худалдааны хурцадмал байдал намжиж эхэлж байгаа шинж тэмдэг ажиглагдаж байна. АНУ Азийн орнуудтай худалдааны шинэ гэрээнүүд байгуулсны дараа алтны үнэ даваа гарагт 3.2 хувиар буурч, 3981 ам.доллар болсон тухай Anadolu агентлаг мэдээллээ.
АНУ-ын Ерөнхийлөгч Дональд Трамп Хятадтай үүссэн худалдааны зөрчлийг намжаах боломжтой гэж мэдэгдсэний дараа алтны үнэ сүүлийн өдрүүдэд буурах хандлагатай болсон. Өмнөх долоо хоногт алтны ханш 4381.6 ам.долларт хүрч, түүхэн дээд үзүүлэлт тогтоогоод байсан юм. Энэ өсөлтөд АНУ, Хятадын зөрчил, Холбооны нөөцийн сангийн хүү бууруулах хүлээлт болон Төв банкуудын алт худалдан авалт нөлөөлсөн гэж шинжээчид үзэж байна.
Гэвч Хятад ховор металлын экспортоо хязгаарласны хариуд 100 хувийн тариф ногдуулна гэж байсан Трамп “шударга тохиролцоо”-нд хүрэх боломжийг онцолж, Камбож, Тайландтай худалдааны гэрээнд гарын үсэг зурсан нь алтны ханш унахад нөлөөлжээ. Мөн Д.Трамп, Ши Жиньпин нарын уулзалт пүрэв гарагт Өмнөд Солонгост болох төлөвтэй байгаа бөгөөд хоёр удирдагч худалдааны маргааныг намжаах талаар хэлэлцэнэ гэж хүлээгдэж байна.
Даваа гарагт мөнгөний нэг унцын үнэ ч 4.3 хувиар буурч, 46.5 ам.доллар болжээ.
Эх сурвалж: Anadolu
