USDT стейблкоиныг гаргадаг Tether компани III улирлын сүүлчийн өдөр 8888 биткоин буюу нэг тэрбум ам.долларын хөрөнгө оруулалт хийжээ. Есдүгээр сарын 30-нд Bitfinex биржээр дамжуулан худалдан авсан энэхүү биткоинууд Tether компанийн нөөцийн түрийвчид шилжсэн байна.
Тус компани гурван жилийн өмнөөс нөөцөө биткоиноор сэлбэж эхэлсэн бөгөөд өнөөдрийн байдлаар нийт 86.3 мянган биткоин эзэмшиж байгаа нь одоогийн ханшаар 9.74 тэрбум ам.долларт хүрчээ. Ингэснээр тэдний нөөцийн ашиг сүүлийн гурван жилд 6.5 тэрбум ам.доллар болж өссөн байна. 2023 оны тавдугаар сард Tether үйл ажиллагааны ашгийнхаа 15 хувийг биткоин худалдан авахад зориулах шийдвэр гаргасан.
Тус компани худалдан авсан зоосоо нэг улирал хадгалсны дараа нөөцийн түрийвч рүүгээ шилжүүлдэг журамтай. Хэдийгээр энэ удаад 8888 биткоин авсан ч өмнөх улиралд Tether нөөцөөсөө 15.2 мянган биткоин буюу 1.6 тэрбум ам.долларын хөрөнгийг гаргасан байна. Одоогийн байдлаар Tether нөөцийн хэмжээгээр хувийн компаниуд дундаа хоёрт бичигдэж байгаа бол тэргүүлж буй нь Bullish криптобиржийг эзэмшдэг Block.One компани юм. Мөн есдүгээр сарын эхээр Tether алт олборлолт, худалдааны салбарт хөрөнгө оруулах хэлэлцээр байгуулсан нь анхаарал татаж байна.
