ШӨХТГ-аас хийсэн хяналт шалгалтын дүнгээ өнөөдөр танилцууллаа. Тус газраас 14 хоног тутамд олон нийтэд энэ талаар мэдээлэл хийж байхаар болжээ.

Энэ удаад тус газар их, дээд сургуулиудын сургалтын төлбөрийн нэмэгдэл, шинэ жилийн баярт зориулсан худалдааны төвүүдээс зарласан хямдрал, урамшуулал үнэн бодитой эсэх, мэдээллийн сайтууд дахь зар сурталчилгаа, цахилгаан барааны дэлгүүрүүд монгол заавар ашиглаж байгаа эсэх боло албан байгууллагын хаяг реклам Монгол хэлний тухай хуулийг зөрчиж байгаа эсэхэд хяналт шалгалт хийсэн байна.

Тухайлбал, үйлдвэрлэл, үйлчилгээ эрхлэгч, аж ахуйн нэгжүүд болон томоохон сүлжээ дэлгүүр, худалдааны төвүүд бараа, бүтээгдэхүүндээ хямдралтай худалдаа эарласан нь Өрсөлдөөний тухай хууль, Хэрэглэгчийн эрхийг хамгаалах тухай хууль, Зар сурталчилгааны тухай хууль болон бусад холбогдох хууль тогтоомжид нийцэж байгаа эсэхийг шалгахад доорх зөрчлүүд илэрсэн байна. Үүнд:

-Хяналт шалгалтад хамрагдаж байгаа аж ахуйн нэгж, байгууллага, худалдааны төвүүдийн хувьд гадна талдаа 50-70 хувь хүртэл хямдралтай гэсэн самбаруудыг байршуулсан боловч бодит байдал дээр бүх бараандаа хямдрал зарлаагүй, хямдрал зарласан бараа бүтээгдэхүүн маш цөөн байна.

-Бараа, бүтээгдэхүүний үнийн шошго байхгүй, ямар төрлийн бараа, бүтээгдэхүүн хямдарсан нь тодорхойгүй боловч гадна самбартаа их хямдарсан мэтээр бодит биш сурталчилгаа явуулж байна.

-Хямдарсан болон хямдраагүй бүх бараа, бүтээгдэхүүний үнийн шошгон дээр шинэ жилийн уур амьсгалыг илтгэсэн үнийн мэдээлэл бүхий хуудсыг байршуулж хэрэглэгчийг төөрөгдүүлж байна

-Гадна талдаа хямдрал зарласан гэсэн боловч хямдралын бараа, бүтээгдэхүүн нь хараахан худалдаалагдаж эхлээгүй.

-Бараа, бүтээгдэхүүндээ хямдрал зарласан боловч хямдралын эхэлсэн болон үргэлжлэх хугацаа тодорхойгүй байна. Энэ нь Хэрэглэгчийн эрхийг хамгаалах болон Зар сурталчилгааны тухай хуулийн зарим заалтуудыг зөрчсөн нь тогтоогдсон тул зөрчил гаргасан аж ахуйн нэгжүүдэд Улсын байцаагчийн хугацаатай албан шаардлага хүргүүлжээ.