Дархан-Уул аймагт энэ жил хур тунадас багатай, хадлан тэжээл бэлтгэхэд хүндрэл учирч байгаа тул малын тоо бус чанарт илүүтэй анхаарч, эдийн засгийн эргэлтэд оруулах зорилгоор мах боловсруулах үйлдвэрүүд тогтмол худалдан авалт хийж байна. “Дархан мах Эрдэнэ комбинат” ХХК хонь худалдан авч Иран улс руу экспортолж байгаа бол “Дархан меат фүүдс” ХХК төлөг, бяруунаас бусад насны мал авч, үхрийн махыг нэг кг нь 10000 төгрөг, хонины махыг 10500 төгрөгөөр үнэлэн 12 дугаар сарын 30-ныг хүртэл Узбек, Хятад, Азербайжан, Казахстан, Катар зэрэг улсад нийлүүлэхээр болсон байна.
Сүүлийн өдрүүдэд бага хэмжээний хур тунадас орж байгаа ч өвс, тэжээлийн хангалттай нөөц бүрдүүлэх боломж хомс байгааг мэргэжилтнүүд анхааруулж байна. Иймд малчид цөөн тооны мал маллаж, чанарт анхаарахыг зөвлөжээ. Орон нутгийн ХХААГ-ын мэдээлснээр мах боловсруулах болон нөөцийн мах бэлтгэх зориулалттай үйлдвэрүүд иргэд, малчдаас тогтмол худалдан авалт хийж байгааг онцолсон байна.
Аймгийн хэмжээнд нийт 238 мянга гаруй толгой буюу хонин тооллогоор 612 мянга орчим мал өвөл, хаврыг даван гарахаар судалгаа гарсан байна. Сумдын бэлчээрийн үнэлгээгээр Дархан, Хонгор, Орхон сумдын нутагт гантай, харин Шарын гол сумын нутагт хэвийн гэж дүгнэжээ.
