Шадар сайд С.Амарсайхан энэ сарын 18-нд Төрийн ордонд болсон 2025-2026 оны намар, өвөлжилтийн бэлтгэлийн явцтай танилцах хурлын үеэр бэлчээрийн өвс, байгалийн хадланг экспортлохыг хориглосон талаар мэдээлэв.

Тэрээр өвс, малын тэжээлийн хангамжийг нэмэгдүүлэх, экспортыг зогсоох, харин импортыг нэмэгдүүлэх чиглэлээр холбогдох арга хэмжээг аж ахуйн нэгж, байгууллага, иргэдийн хамтын ажиллагаатайгаар хэрэгжүүлж байгааг онцоллоо. Гангийн зураглалаар Увс, Баян-Өлгий, Ховд, Дархан-Уулын ихэнх нутаг, мөн Завхан, Говь-Алтай, Баянхонгор, Төв, Сэлэнгийн зарим сум гантай болон гандуу гарчээ.

Бэлчээрийн ургамлын гарц, гангийн түвшнээс харахад ирэх өвөл, хавар хүндрэх эрсдэл өндөр байгааг салбарынхан анхааруулсан байна. Улсын онцгой комиссын хурлаар аймаг, нийслэлийн Засаг дарга нарт өвөлжилтийн бэлтгэл, бэлэн байдлыг эртнээс хангах, нарийвчилсан төлөвлөгөө боловсруулахыг үүрэг болгожээ.

Эх сурвалж: Улсын онцгой комисс