Эрчим хүчний салбарын хэлэлцүүлгийн үеэр Эрчим хүчний сайд Б.Чойжилсүрэнгийн Увс аймгийн Улаангом сумын Төв цэнгэлдэхийн орчим болон төв замын гэрэлтүүлгийн цахилгаан хангамжийг шийдвэрлэхэд 2 тэрбум төгрөг зарцуулсан асуудлыг хөндлөө. Эрчим хүчний яам үүнийг тухайн аймгийн цахилгаан хангамжийг сайжруулах зорилготой, улсын хэмжээнд хэрэгжиж буй төсөл арга хэмжээний нэг хэмээн тайлбарлав. Мөн 2026 онд Эрдэнэбүрэнгийн усан цахилгаан станцыг ашиглалтад оруулж, 10 аймгийн төвд дулаан, цахилгаан хангамж бий болгохоор төлөвлөж буйгаа онцлов.

Хэлэлцүүлэгт оролцсон “Эрчим маш” ХХК-ийн захирал Б.Ганбаатар хувийн хэвшлийнхний хувьд засварын ажил хийхэд төсөв, хөрөнгө дутагдалтай байгаа тул алдагдалд орж буйг дурдав. Тэрээр нэг кВт дулааныг 30 төгрөгөөр үйлдвэрлээд 10 төгрөгөөр нийлүүлдэг, ингэснээр 20 төгрөгийн алдагдал үүсэж, үнэ тариф нэмэхгүй бол засварын хөрөнгө бүрдэхгүйг онцоллоо. Мөн хуучин тоноглолын сэлбэг олоход хүндрэлтэй, өндөр үнэтэй тул станцуудын шинэчлэл яаралтай хэрэгтэйг хэлэв.

Түүний хэлснээр өнөөгийн станцуудын зарим турбин, зуух хуучирч, шаардлагатай сэлбэггүйгээс эвдрэл гарах эрсдэл өндөр байгаа бөгөөд энэ өвөл хүйтний улиралд хүнд нөхцөл үүсэж болзошгүй байна. Иймээс зөвхөн шинэ станц барих бус одоо ажиллаж байгаа станцуудын тоноглолыг үе шаттай шинэчлэх шаардлагатайг санууллаа.

Эх сурвалж: Эрчим хүчний салбарын хэлэлцүүлэг