Цаг уурын нөхцөл байдал болон бэлчээрийн ургамлын ургалтаас шалтгаалан 2025 оны наймдугаар сарын эхний долоо хоногт Өвөрхангай, Баян-Өлгий, Өмнөговь, Ховд, Дорноговь аймаг их эрсдэлтэй бүсэд багтаж буйг гангийн эрсдэлийн ерөнхий үнэлгээнээс харуулж байна. Улсын хэмжээнд нийт 330 сумын дотор маш их эрсдэлтэй 25 сум, их эрсдэлтэй 54 сум бүртгэгджээ.
Цаг уурын байгууллагаас гаргасан мэдээллээр бэлчээрийн ургамлын ургалтын байдал нийт нутгийн 38 хувьд гантай болон гандуу, 62 хувьд хэвийн байгаа нь мал аж ахуйн бүс нутагт өвөлжилтийн хүндрэл дагуулах өндөр эрсдэлтэйг илтгэж байна.
Иймд ОБЕГ-ын тэргүүн дэд дарга, штабын дарга бригадын генерал Ц.Ганзориг Ажиллагааны шуурхай штабын бүрэлдэхүүнд дараах үүргийг өгчээ:
-
Гангийн эрсдэлийн үнэлгээг 14 хоног тутамд шинэчлэх
-
Эрсдэлд тулгуурлан хариу арга хэмжээг төлөвлөх
-
Аймаг, сумдын аюулгүйн нөөцөд өвс, тэжээл бэлтгэх ажлыг цаг алдалгүй зохион байгуулах
-
Отор нүүдлийн төлөвлөлтийг эртнээс хийж, оновчтой зохион байгуулах
-
Салбар дундын уялдаа холбоог сайжруулж, нэгдсэн удирдлага, зохион байгуулалтаар ажиллах
Эдгээр арга хэмжээ нь байгалийн хатуу нөхцөлд амьжиргаагаа залгуулдаг малчдын хохирлыг бууруулах, өвөлжилт, хаваржилтын хүндрэлээс сэргийлэхэд чиглэж байна. Хариу арга хэмжээний зохион байгуулалт, мэдээлэл солилцоо, орон нутгийн засаг захиргаа болон салбарын байгууллагуудын хамтын ажиллагаа онцгой ач холбогдолтой байгааг ОБЕГ онцолжээ.
Эх сурвалж: ОБЕГ
