Өнөөдөр буюу 2025 оны зургаадугаар сарын 25-ны өдөр “Монголын хөрөнгийн бирж” ХК-ийн “MSE Hall”-д “Омни ассет II ТЗК” ХХК-аас олон нийтэд санал болгон гаргаж буй хөрөнгөөр баталгаажсан үнэт цаас (ХБҮЦ)-ны анхдагч зах зээлийн арилжааг нээх цан цохих ёслол боллоо.

Ёслолд Монголын хөрөнгийн бирж, Санхүүгийн зохицуулах хороо, “Омни Капитал ББСБ” ХХК, “Апекс Капитал ҮЦК” ХХК болон мэргэжлийн байгууллагуудын төлөөлөл оролцож, хөрөнгө оруулагчдад хандан амжилт хүсэж үг хэлэв.

“Омни ассет II” үнэт цаасны онцлог:

• Жилийн 19.2 хувийн хүүтэй

• 24 сарын хугацаатай

• Нэг бүр нь 100,000 төгрөгийн үнэ бүхий 140,000 ширхэг

• Нийт 14 тэрбум төгрөгийн санхүүжилт татан төвлөрүүлэх зорилготой

• Хүүгийн төлбөрийг улирал тутам олгоно

Монголын хөрөнгийн биржийн үүргийг түр орлон гүйцэтгэгч Б.Дөлгөөн хэлэхдээ “Омни Капитал нь өмнөх жилүүдэд ч ХБҮЦ гарган, хүүгийн төлбөрөө тогтмол олгож байсан, хөрөнгө оруулагчдын итгэлийг хүлээсэн туршлагатай байгууллага” хэмээн онцоллоо.

Санхүүгийн зохицуулах хорооны дэд дарга Т.Цэрэнбадрал:

“Сүүлийн жилүүдэд зах зээлд бонд, ногоон бонд, сошиал бонд, ХБҮЦ зэрэг олон төрлийн шинэ бүтээгдэхүүнүүд гарч, дотоодын компаниуд нийт 273 тэрбум төгрөгийн санхүүжилт татан төвлөрүүлсэн нь манай зах зээлийн хөгжилд чухал хувь нэмэр болж байна” гэв.

Мөн “Апекс Капитал ҮЦК” ХХК-ийн Гүйцэтгэх захирал Б.Лхамдолгор:

“Хөрөнгө оруулагчдын хувьд эрсдэл багатай, өндөр өгөөжтэй энэхүү бүтээгдэхүүн нь сонголтын шинэ боломж нээж байгаа” гэж тодотголоо.

Арилжааны захиалгыг 2025 оны 6-р сарын 25-наас эхлэн 5 ажлын өдрийн турш “Монголын хөрөнгийн бирж”-ийн IPO системээр дамжуулан хүлээн авна.

Анхдагч зах зээлийн арилжааг нээх цан цохих ёслолыг “Омни Капитал ББСБ” ХХК-ийн ТУЗ-ийн дарга Э.Пүрэвсүрэн гүйцэтгэсэн юм.

Эх сурвалж: Монголын хөрөнгийн бирж, Санхүүгийн зохицуулах хороо.