Улсын Их Хурлын Байгаль орчин, хүнс, хөдөө аж ахуйн байнгын хорооны зургаадугаар сарын 24-ний хуралдаанаар хаврын тариалалтын урьдчилсан дүн мэдээний талаар ХХААХҮ-ийн сайд Ж.Энхбаяр мэдээлэл хийлээ.

Сайдын танилцуулснаар, тариалалтын ажил тавдугаар сарын 7-ноос эхэлж, өнөөдрийн байдлаар нийт 479.5 мянган га талбайд тариалалт хийгдсэн бөгөөд энэ нь төлөвлөсөн хэмжээнээс доогуур, гүйцэтгэл 74 хувьтай байна. Үүнээс:

• 264.8 мянган га-д улаанбуудай

• 12.1 мянган га-д төмс

• 9.2 мянган га-д хүнсний ногоо

• 32.2 мянган га-д малын тэжээл

• 126.3 мянган га-д тосны ургамал тус тус тариалжээ. Үр тариа, төмсний тариалалт дууссан бол малын тэжээл, хүнсний ногооны тариалалт үргэлжилж байна.

Цаг агаарын хүнд нөхцөл зарим бүс нутагт, ялангуяа Сэлэнгэ, Төв, Дархан-Уул, Дорнод аймгийн сумдаар халуун 30 хэмээс давж, хөрсний гадарга 50 хэмээс өндөр халсан нь соёололтыг харилцан адилгүй болгож, тариалалтын чанарт нөлөөлсөн байна.

Чиглэл, дэмжлэг, хөрөнгө оруулалт

• “Атар-IV” аяны хүрээнд хөнгөлөлттэй зээлийн багц батлагдаж, 800 тэрбум төгрөгийн зээлээс газар тариаланд 345 тэрбумыг хуваарилжээ.

  • Өнөөдрийн байдлаар 128.3 тэрбумын эргэлтийн хөрөнгө,

  • 50.2 тэрбумын хөрөнгө оруулалтын зээл 599 иргэн, ААН-д олгогдоод байна.

• Засгийн газраас тариалангийн эргэлтийн талбайг 71.2 мянган га-аар нэмэгдүүлсэн бөгөөд энэ тоог цаашид 200 мянган га хүртэл нэмэгдүүлэхээр ажиллаж байна.

Салбарын тулгамдсан асуудал, шийдэл

• Хүн хүчний хомстол газар тариаланд гүнзгийрч байгаа тул механикжуулалтыг нэмэгдүүлж, техник тоног төхөөрөмжийн татварын ачааллыг бууруулах шаардлагатай гэж сайд онцолсон. Үүнд:

  • Гааль, НӨАТ-аас чөлөөлөх хуулийн хэрэгжих хугацааг сунгах,

  • Импортын тэжээл, улаанбуудайн гурилыг татвараас чөлөөлөх хууль хүчингүй болохтой холбоотой асуудлыг шуурхай шийдвэрлэх шаардлагатай байгааг тэмдэглэв.

• Сортын шинэчлэл, нутагшуулах бодлого баримтлан, дотоодын үр үйлдвэрлэлийг нэмэгдүүлж, торгон болон баталгаажсан үрээр хэрэгцээг хангах чиглэлд ажиллаж буйг дурдав.

• Цаашид тэжээлийн ургамал, тосны ургамал, вандуй, эрдэнэшиш зэрэг таримлыг тариалалтад түлхүү оруулж, газар тариалан, мал аж ахуйн хосолмол хөгжлийг дэмжих зорилт тавьжээ.

Мөн хөдөө аж ахуйн салбарын эрсдэлийг бууруулах зорилгоор “Хөдөө аж ахуйн даатгалын тухай” хуулийн төслийг боловсруулан батлуулах шаардлагатай байгааг танилцуулсан байна.

Эх сурвалж: УИХ-ын Байгаль орчин, хүнс, хөдөө аж ахуйн байнгын хороо