Азийн Хөгжлийн Банк (АХБ) энэ онд Монгол төгрөгийн бондыг хоёр дахь удаагаа амжилттай гаргаж, ойролцоогоор 15.6 сая ам.доллартай тэнцэх хэмжээний хөрөнгийг татан төвлөрүүллээ. Энэхүү хөрөнгө нь Монгол Улсын сүү, сүүн бүтээгдэхүүний салбарын тогтвортой хөгжлийг дэмжихэд чиглэгдэх юм.
Бондоор татан төвлөрүүлсэн хөрөнгийг “АПУ Дэйри ХХК-Сүү, сүүн бүтээгдэхүүний нэмүү өртгийн хүртээмжтэй сүлжээг дэмжих төсөл”-ийн хүрээнд зориулахаар шийдвэрлэжээ. Тодруулбал, уг хөрөнгөөр шинэ үйлдвэрийн барилга барих, сүү боловсруулах, савлах хүчин чадлыг нэмэгдүүлэх, түүхий сүү цуглуулах цэгүүдийг байгуулах, мөн эргэлтийн хөрөнгийн хэрэгцээг хангах зэрэгт зарцуулагдана. Төсөл нь дотоодын нөөцөөс сүү ханган нийлүүлэх тогтвортой тогтолцоог бүрдүүлэхээс гадна энэ салбарын үйлдвэрлэлд эмэгтэйчүүдийн оролцоог нэмэгдүүлэх стратегийн чухал зорилготой юм.
Монгол төгрөгөөр нэрлэсэн энэхүү бонд нь 6.1 жилийн хугацаатай бөгөөд жилийн 10.3 хувийн тогтмол хүүтэй байх нөхцөлтэй байна. Энэ нь АХБ-наас 2020 онд анх гаргасан “Номад” бондоос хойш гарч буй хамгийн их нэрлэсэн дүнтэй, урт хугацаатай төгрөгийн бонд болж байгаагаараа онцлог юм.
