Улаанбаатар хотод энэ сарын 17-нд Эдийн засгийн бодлого, өрсөлдөх чадварын судалгааны төвөөс мэдээлснээр, Монгол Улс 2025 оны дэлхийн өрсөлдөх чадварын тайланд хамрагдсан 69 улсын дунд 65 дугаар байрт жагсжээ. Манай улс нийт 100 онооноос 40 оноо авч, өмнөх оныхоос таван оноогоор буурсан нь дөрвөн байр ухрах шалтгаан болжээ.
Судалгаанд эдийн засгийн тогтвортой байдал, засаглалын чанар, бизнесийн орчин, дэд бүтцийн хөгжил зэрэг голлох үзүүлэлтүүд сөрөг нөлөө үзүүлсэн байна. Судлаач Ч.Ганбатын хэлснээр, эдийн засгийн тамир тэнхээний үзүүлэлтээр 13 байр, засаглалын үр ашгаар 7 байр, бизнесийн байгууллагын ашигт ажиллагаагаар 3 байр, дэд бүтцээр 2 байр ухарсан байна. Гэвч ажиллах хүчний урт хугацааны өсөлт болон аялал жуулчлалаас орж ирж буй орлогын хэмжээ нэмэгдсэн нь эерэг өөрчлөлт болсон байна.
Тайланд дурдсанаар, Монгол Улсын өрсөлдөх чадварт дараах эрсдэлүүд сөргөөр нөлөөлжээ:
-
Уул уурхай болон түүхий эдийн үнийн хэлбэлзэлд хэт хамааралтай байх
-
Дотоодын мөнгөний бодлого, дэлхийн худалдааны маргааны нөлөөгөөр үүссэн инфляц
-
Татварын ачаалал, төрийн хэт оролцооноос шалтгаалсан бизнесийн орчны хүндрэл
-
Боловсролтой, чадварлаг залуусын гадагш чиглэсэн шилжилт
-
Уур амьсгалын өөрчлөлтөд өртөмтгий эдийн засаг
Энэ оны тайланг Швейцар улс тэргүүлсэн бөгөөд түүний араас Сингапур, Дани, Арабын Нэгдсэн Эмират, Ирланд, Швед улс эхний аравт багтжээ.
Сэтгэгдэл (1)