Нийгмийн даатгалын шимтгэлийн 2025 оны нэгдүгээр улиралд нийт 53.7 мянган аж ахуйн нэгж, байгууллага (ААНБ)-аас 811.6 мянган ажиллагч хамрагджээ. Энэ нь өмнөх оны мөн үетэй харьцуулахад шимтгэл төлсөн ААНБ 4400-аар, ажиллагчид 58.2 мянгаар нэмэгдсэн үзүүлэлт юм.

Шимтгэл төлөгчдийн дотор 117.6 мянга нь боловсролын салбарт, 113.6 мянга нь худалдаа, засвар үйлчилгээний, 81.8 мянга нь төрийн удирдлага, батлан хамгаалал, нийгмийн хамгааллын, 76.1 мянга нь боловсруулах үйлдвэрлэлийн, 49.6 мянга нь уул уурхай, олборлолтын салбарт ажиллаж байна. Мөн 48.8 мянга нь тээвэр, агуулахын, 49.1 мянга нь эрүүл мэнд, халамжийн, 48.3 мянга нь барилгын, 32 мянга нь санхүү, даатгалын, 27.5 мянга нь удирдлагын дэмжлэг үзүүлэх, 167 мянга нь бусад салбарын ажиллагсад байна.

Цалингийн үзүүлэлтүүд:

• Улсын хэмжээнд сарын дундаж нэрлэсэн цалин 2 сая 622 мянган төгрөг

• Голч цалин 2 сая 245 мянга

• Үндсэн цалингийн дундаж 2 сая 386 мянга

Хамгийн өндөр цалинтай салбар бол уул уурхай, олборлолт бөгөөд тэнд ажиллагсдын дундаж цалин 4.9 сая төгрөг, энэ нь улсын дунджаас 88.2 хувиар өндөр. Харин хамгийн бага нь зочид буудал, нийтийн хоолны салбар — 1.7 сая төгрөг байна.

Цахилгаан, хий, уурын салбарын ажиллагсдын голч цалин 4 сая төгрөг байгаа нь хамгийн өндөр үзүүлэлт болжээ.

Ажиллагсдын 27.1 хувь нь 1.5–2.5 сая, хамгийн бага буюу 8.9 хувь нь 3.0–3.5 сая төгрөгийн цалинтай байна. Ажиллагчдын тоо ихсэхийн хэрээр байгууллагын дундаж цалин өсдөг хандлагатай байна.

Бүс нутгаар:

• Хангай, Төвийн бүс, Улаанбаатарт цалин улсын дунджаас 1.0–4.4 хувиар их

• Баруун, Зүүн бүсэд 7.1–16.6 хувиар бага

Эзэмшлийн хэлбэрээр:

• Төрийн өмчит үйлдвэрийн газар — 3.5 сая

• Хувьцаат компани — 2.9 сая

• Орон нутгийн өмчит — 2.7 сая
  Эдгээр нь улсын дунджаас 55.6–919.8 мянгаар их байна.

Хүйсийн ялгаа:

• Эрэгтэйчүүдийн цалин — 2.8 сая

• Эмэгтэйчүүдийн цалин — 2.4 сая

• Нөхөрлөл, хоршоонд эмэгтэйчүүдийн цалин илүү байдаг бол бусад салбарт эрэгтэйчүүдийн цалин 5.6–23.9 хувиар илүү байна.

Мэргэжлээр:

• Суурин төхөөрөмж, машин механизмын операторчдын дундаж — 3.1 сая (улсын дунджаас 495.4 мянгаар их)

• ХАА, ой, загас агнуурын мэргэжилтнүүдийн цалин — 1.5 сая, хамгийн бага буюу улсын дунджаас 1.2 сая төгрөгөөр бага байна.

Эх сурвалж: ҮСХ, Нийгмийн даатгалын ерөнхий газар