Улаанбаатар хот 2024 онд нийтийн тээврийн салбарт цогц шинэчлэл хийсний үр дүнд нийтийн тээврийн орлого түүхэндээ анх удаа огцом өсөлттэй гарлаа. Тодруулбал, нийтийн тээврээр зорчих иргэдийн тоо, зорчилтын давтамж нэмэгдэж, зохион байгуулалт, хяналт сайжирснаар 2025 оны эхний таван сарын байдлаар нийт орлого 22 тэрбум төгрөгөөс давсан байна.

2024 оны эхний таван сард “Улаанбаатар смарт карт” ХХК-аар дамжуулан 13 тэрбум төгрөгийн орлого төвлөрсөн бол энэ оны мөн үед 16.1 тэрбум төгрөг болж, 3.1 тэрбум төгрөгөөр өссөн үзүүлэлттэй байна. Энэ нь нийтийн тээврийн төлбөрийн хяналт, бүртгэл илүү ил тод, нэгдсэн системтэй болсон гэдгийг харуулж байгаа юм.

Нийслэл хот 2024 оны тавдугаар сард “Улаанбаатар смарт карт” ХХК-ийн 79 хувийг эзэмшигч болсон нь нийтийн тээврийн орлого, зохицуулалтыг төр хяналтдаа авч, ашигтай, үр ашигтай тогтолцоонд шилжих үндэс суурийг тавьжээ.

Мөн зорчигчдын тоон мэдээлэл ч нэмэгдсэн байна. 2024 оны эхний таван сард нийт 60.8 сая зорчигч нийтийн тээврээр зорчсон бол 2025 оны эхний таван сард 68.4 сая зорчилт бүртгэгдэж, 7.6 сая зорчигчоор нэмэгджээ. Энэ нь нийтийн тээврийн хүртээмж, үйлчилгээний чанар сайжирсныг илтгэж байгаа юм.

Нийтийн тээврийн нийт орлого 2024 онд 13 тэрбум төгрөг байсан бол 2025 онд 22 тэрбум төгрөг болж, 9 тэрбум төгрөгөөр өссөн үзүүлэлттэй байна. Үүний дүнд нийтийн тээврийн салбар санхүүгийн хувьд бие дааж, шинэчлэл, парк шинэчлэл, үйлчилгээний хүртээмжийг улам сайжруулах боломжтой болж байна.

Эх сурвалж: Нийслэлийн Засаг даргын Тамгын газар – Хэвлэл мэдээлэл, олон нийттэй харилцах хэлтэс.