Монгол Улсын Ерөнхийлөгч, Зэвсэгт хүчний Ерөнхий командлагчийн ивээл дор “Даян дэлхийн энх тайван, тогтвортой хөгжилд төр, хувийн хэвшлийн оролцоо” сэдэвт олон улсын санаачилга уулзалт Зэвсэгт хүчний сургалтын нэгдсэн төвд зохион байгуулагдаж байна. Энэхүү уулзалт нь “Хааны эрэлд-2025” энхийг дэмжих ажиллагааны олон улсын сургуулийн хүрээнд болж буйгаараа онцлог бөгөөд цэргийн алба хаагчид болон үндэсний үйлдвэрлэл, олон улсын хамтын ажиллагааны холбогч гүүр болж байна.

Тус арга хэмжээнд Монгол болон гадаадын нийт 31 компани оролцож, цэргийн зориулалттай хангалт, хэрэгсэл, тоног төхөөрөмж, хувцас, хүнсний бүтээгдэхүүн зэрэг бараа, бүтээгдэхүүнээ танилцуулсан нь Монголын үндэсний үйлдвэрлэгчдийн чанар, чадамжийг олон улсад харуулах бодит боломж болжээ. Үүний зорилго нь НҮБ-ын энхийг сахиулах, хүмүүнлэгийн ажиллагаанд Монголын аж ахуйн нэгжүүдийг татан оролцуулах, материал, хангалтын үйлчилгээг дотоодоос нийлүүлдэг тогтолцоог бүрдүүлэх явдал юм.

“Хааны эрэлд-2025” энхийг дэмжих ажиллагааны хамтарсан олон улсын сургуулилтад БНХАУ-ын Ардын чөлөөлөх армийн хуурай замын анги, Энэтхэгийн 40 цэргийн алба хаагч, БНСУ, БНТУ, БНСВУ зэрэг орны нийт 1200 гаруй алба хаагч оролцож байна. Сургуулилт энэ сарын 14-нөөс 28-ны хооронд үргэлжилж байгаа бөгөөд бүс нутгийн аюулгүй байдал, энхийг дэмжих ажиллагааны бэлэн байдлыг дээшлүүлэхэд чиглэж байна.

Үзэсгэлэнгийн хүрээнд “Цагаан алт” үндэсний хөдөлгөөнд нэгдсэн арьс шир, ноос, ноолуурын салбарын үндэсний компаниуд бүтээгдэхүүнээ танилцуулсан. Арьс ширний үйлдвэрлэлийн чиглэлд “Хос Аз”, “Дархан нэхий”, “Бест шүес”, “Баян цагаан нуур”, “Хүүгийн гутал”, “Мон гловес”, “Агни”, “Делбакс”, “Кажуг” зэрэг компаниуд оролцож, цэргийн болон хөдөлмөр хамгааллын гутал, савхин хувцас, бээлий, бүс зэрэг бүтээгдэхүүнээ танилцуулсан бол ноос, ноолууран бүтээгдэхүүний чиглэлд “Кашемир Холдинг”, “Баялаг Өлзий”, “Блю Скай Кашемир”, “Эрдэнэт хивс”, “Монгол нэхмэл”, “Ноос Ирээдүй”, “Янмал”, “Тод оймс” зэрэг компаниуд ноосон мишок, гудас, ноолууран цамц, ороолт, бээлий, оймс зэрэг бүтээгдэхүүнийг сонирхуулжээ.

Энэхүү санаачилга уулзалт нь төр, хувийн хэвшлийн үр дүнтэй түншлэлийн шинэ жишиг болохын зэрэгцээ үндэсний үйлдвэрлэгчдийг энхийг сахиулах ажиллагаанд бодитойгоор оролцуулах боломжийг нээж байгаагаараа онцлог ач холбогдолтой боллоо.

Эх сурвалж: Батлан хамгаалах яам.