Израилын зүгээс Иранд цохилт өгснөө мэдэгдсэн нь Ойрх Дорнод дахь хурцадмал байдлыг улам даамжруулж, дэлхийн газрын тосны зах зээлд хүчтэй цочрол өглөө. Үүний улмаас өнөө өглөө Brent төрлийн нефтийн үнэ таван хувиар өсөж, торх нь 73.27 ам.долларт хүрсэн нь сүүлийн хоёр сар гаруйн хугацаан дахь хамгийн өндөр түвшинд тооцогдож байна. Энэ нь дөрөвдүгээр сарын гуравнаас хойших дээд хэмжээ юм.
Израилын цэргийн ажиллагаа баасан гаргийн үүрээр явагдсан бөгөөд Техранд дэлбэрэлт болсон тухай Ираны хэвлэлүүд мэдээлсэн байна. Хэдийгээр албан ёсны дэлгэрэнгүй мэдээлэл хомс байгаа ч, нөхцөл байдал улам хурцдах төлөвтэй байна гэж шинжээчид анхааруулж байна.
“MST Marquee” компанийн эрчим хүчний ахлах шинжээч Саул Кавонич хэлэхдээ, мөргөлдөөн даамжирч, Ираны зүгээс бүс нутгийн газрын тосны дэд бүтцэд хариу цохилт өгвөл бодит хомсдол үүсч болзошгүйг онцолжээ. Тэрээр “Хамгийн муу хувилбараар Иран дэд бүтцэд шууд халдах, эсвэл Ормузын хоолойгоор дамжих тээвэрлэлтийг хязгаарлавал дэлхийн зах зээлд өдөрт 20 сая торх нефтийн нийлүүлэлт тасалдах эрсдэлтэй” хэмээн сануулсан байна.
Ормузын хоолой нь дэлхийн нийт нефтийн тээвэрлэлтийн ойролцоогоор гуравны нэгийг дамжуулдаг стратегийн чухал бүс нутаг тул энд үүсэх аливаа хямрал дэлхийн эрчим хүчний ханган нийлүүлэлтэд ноцтой аюул дагуулах магадлал өндөр байгаа юм.
Эх сурвалж: Reuters.com
Сэтгэгдэл (10)