Олон улсын хэмжээнд зургаадугаар сарын 27-нд тэмдэглэдэг Бичил, Жижиг, Дунд Үйлдвэрүүдийн (БЖДҮ) өдрийг угтан Монгол Улсын Засгийн газраас энэ сарын 12-15-ны өдрүүдэд үндэсний хэмжээний үзэсгэлэн, арга хэмжээг зохион байгуулж эхэллээ. Энэхүү арга хэмжээ нь БЖДҮ-ийн тогтвортой өсөлтийг дэмжих, бүтээгдэхүүн үйлчилгээний борлуулалтыг нэмэгдүүлэх, бизнесийн түншлэл бий болгох зорилготой юм.
Сүхбаатарын талбайд болж буй арга хэмжээнд нийслэлийн есөн дүүрэг, 21 аймгаас нийт 300 орчим бизнес эрхлэгч, хоршоо оролцож, бүтээгдэхүүн үйлчилгээгээ 150 гаруй асар болон 10 гаруй монгол гэрт дэлгэн танилцуулж байна. Үндэсний үйлдвэрлэгчид энэ үеэр өөрсдийн бараа бүтээгдэхүүнийг үйлдвэрийн үнээр худалдаалж, хэрэглэгчдэд илүү хямд, шууд худалдан авах боломжийг олгож байгаа нь онцлог юм.
Энэхүү арга хэмжээ нь зөвхөн үзэсгэлэн, худалдааны хэлбэрээр хязгаарлагдахгүй, харин мэдлэг солилцох, туршлага хуваалцах, бизнесийн хамтын ажиллагаа өрнүүлэх, энтрепренёр сэтгэлгээг төлөвшүүлэх чухал платформ болж байгаагаараа онцлог юм. БЖДҮ нь эдийн засгийн өсөлтийн гол хөдөлгүүр төдийгүй орон нутгийн хөгжил, ажлын байрны үндсэн эх үүсвэр болж байгаа тул тэднийг дэмжих төрийн бодлого, арга хэмжээ энэ удаа илүү өргөн хүрээг хамарч байгааг оролцогчид өндрөөр үнэлж байна.
Эх сурвалж: Эдийн засгийн хөгжлийн яам.
Сэтгэгдэл (7)