Швейцарын Женев хотноо энэ сарын 2-13-нд болж буй Олон улсын хөдөлмөрийн байгууллагын (ОУХБ) 113 дугаар чуулганд Монгол Улсаас Элчин сайд, Байнгын төлөөлөгч Д.Гэрэлмаа тэргүүтэй төлөөлөгчид оролцож байна. Чуулганы хүрээнд энэ сарын 5-ны өдөр болсон нэгдсэн хуралдаанд Элчин сайд Д.Гэрэлмаа үг хэлж, Монгол Улсын хөдөлмөр, нийгмийн салбарт хэрэгжүүлж буй шинэчлэл, бодлого, арга хэмжээг танилцууллаа.

Тэрбээр Монгол Улсын Засгийн газраас зохистой хөдөлмөр эрхлэлтийг дэмжих, хөдөлмөрийн аюулгүй байдал, эрүүл ахуйн хууль тогтоомжийг шинэчлэх, хөдөлмөрийн хяналтын тогтолцоог бэхжүүлэх, албадан хөдөлмөрийн бүх хэлбэрийг устгах талаар цогц арга хэмжээ авч буйг онцлон тэмдэглэв. Түүнчлэн ОУХБ-тай хамтран хөдөлмөрийн эрх зүйн орчны үнэлгээ хийж, шинэчлэлд шинжлэх ухааны үндэслэлтэйгээр хандаж буйг дурдсан юм.

Монгол Улс байгаль орчны тогтвортой байдал болон зохистой хөдөлмөрийг уялдуулсан ногоон эдийн засгийн чиглэлээр ч тодорхой алхам хийж байгаа бөгөөд сэргээгдэх эрчим хүчний салбарт хөрөнгө оруулалт хийж, ногоон ур чадварыг хөгжүүлэх хөтөлбөрийг хэрэгжүүлж байгааг илэрхийлэв.

Мөн нийгмийн хамгааллын салбарт хүртээмжийг нэмэгдүүлж, тэтгэмж олголтыг цахимжуулах, тэтгэврийн тогтолцоог шинэчлэх, нийгмийн даатгалын системийг илүү шуурхай, хүртээмжтэй болгох шинэчлэлүүдийг хэрэгжүүлж байгааг танилцуулжээ.

Элчин сайд Д.Гэрэлмаа хэлсэн үгэндээ нийгмийн гурван талт яриа хэлэлцээ (төр, ажил олгогч, ажилтан) нь хөдөлмөрийн бодлогын тулгын чулуу болж байгааг онцлон тэмдэглэсэн байна. Энэ нь хөдөлмөрийн харилцааны тэнцвэртэй, тогтвортой байдлыг хангахад чухал үүрэгтэй гэдгийг олон улсын хамт олонд уламжилжээ.

Эх сурвалж: Гадаад харилцааны яам