Улаанбаатар хотод 2025 оны зургаадугаар сарын 9-ний байдлаар гол нэрийн зарим барааны үнэ өмнөх долоо хоногтой харьцуулахад 0.6 хувь, өмнөх сараас 1.6 хувиар өссөн байна. Нийслэлд үхрийн махны үнэ хамгийн их буюу 3.4 хувиар нэмэгдэж, нэг килограмм нь 21,418 төгрөгт хүрсэн бол харин хонины мах 1.1 хувиар буурч, 17,163 төгрөг болжээ. Ямааны махны үнэ тогтвортой байв.
Төмсний үнэ 4.0 хувиар өсч, 1504 төгрөгт хүрсэн нь хүнсний ногооны салбарт хамгийн өндөр өсөлттэй үзүүлэлт болов. Сонгинын үнэ мөн өсөж 1.1 хувиар нэмэгдэн, 4845 төгрөгт хүрсэн байна. Харин гурил, талх, элсэн чихэр, цагаан будааны үнэ тогтвортой байгаа ч 1-р зэргийн гурил 0.8 хувиар өссөн байна.
Аймгийн төвүүдэд махны үнэ харьцангуй бага байгаа бөгөөд хонины мах 14,865 төгрөг, ямааны мах 12,172 төгрөг, үхрийн мах 18,416 төгрөг болжээ. Махны үнийн хувьд хонины мах 1.9 хувиар, ямааны мах 1.3 хувиар буурсан бол үхрийн мах 0.5 хувиар нэмэгдсэн байна.
Мөн аймаг орон нутагт сүүний үнэ 3.8 хувиар буурч 3735 төгрөг болсон бол цагаан будаа 0.6 хувиар өссөн байна. Элсэн чихэр, дизелийн түлшний үнэ бага зэрэг буурсан бол АИ-92 болон A-80 төрлийн бензиний үнэ өөрчлөлтгүй хадгалагдаж байгаа юм.
Эдгээр өөрчлөлтүүд нь нийслэл, хөдөө орон нутгийн хүнсний хангамж, тээвэрлэлтийн өртөг, улирлын онцлогтой уялдан хэлбэлзэж буйг харуулж байна.
